ଭୁବନେଶ୍ୱର,୨୮।୪(ବ୍ୟୁରୋ): ବାତ୍ୟା ହେଉ କି ବନ୍ୟା। ଦୃଢତାର ସହ ମୁକାବିଲା କରିବାରେ କେବେ ପଛଘୁଞ୍ଚା ଦେଇନି ଓଡ଼ିଶା। ଯେତେ ପ୍ରାକୃତିକ ବିପର୍ଯ୍ୟୟ ଆସିଲେ ବି ଭାଙ୍ଗିପଡ଼ିନାହାନ୍ତି ଓଡ଼ିଶାବାସୀ। ପ୍ରତିଥର ଅଣ୍ଟାସଳଖି ଛିଡ଼ାହୋଇଛନ୍ତି। ପୂର୍ବଗୌରବ ଫେରିବା ସହ ନୂଆ ସକାଳ ଆସିଛି, ଆଉ ଫେରିଛି ରାଜ୍ୟବାସୀଙ୍କ ଖୁସି। ଏଥର ବି ପୁଣି ଫେରିବ ସେହି ଖୁସିର ଦିନ। ଆଉ ଥରେ ଆସିବ ନୂଆ ସକାଳ। ଏ ମହାମାରୀ ବି ଚାଲିଯିବ। କିଛିଦିନର ଅପେକ୍ଷା ପରେ ପୁଣି ସବୁ କିଛି ପୂର୍ବଭଳି ସ୍ବାଭାବିକ ହୋଇଯିବ। ଓଡ଼ିଶାବାସୀଙ୍କ ଧୈର୍ଯ୍ୟ ଆଗରେ କରୋନା ହାର୍ ମାନିବ। ସୋମବାର ଟୁଇଟ୍ କରି ଓଡ଼ିଶାବାସୀଙ୍କୁ ଏଭଳି ସାହସ ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗ ପକ୍ଷରୁ ପ୍ରସ୍ତୁତ ଏକ ମ୍ୟୁଜିକ୍ ଭିଡ଼ିଓକୁ ଶେୟାର କରି ମୁଖ୍ୟମନ୍ତ୍ରୀ ଧୈର୍ଯ୍ୟର ସହ କରୋନାର ସମ୍ମୁଖୀନ କରିବାକୁ ରାଜ୍ୟବାସୀଙ୍କୁ ଆହ୍ବାନ ଦେଇଛନ୍ତି।
ପ୍ରଳୟଙ୍କରୀ ବାତ୍ୟା ହୁଡ୍ହୁଡ୍ରୁ ଆରମ୍ଭ କରି ଫନୀ ପର୍ଯ୍ୟନ୍ତ, କିଛି ବି ଓଡ଼ିଶାର ମନୋବଳକୁ ଦୋହଲାଇ ପାରି ଥିଲା। ଠିକ୍ ସେହିଭଳି ମହାମାରୀ କରୋନା ବି ଆମର କିଛି କ୍ଷତି କରିପାରିବ ନାହିଁ। ଜଗତର ନାଥ ଜଗନ୍ନାଥଙ୍କ ପହଡ଼ ଖୁବ୍ଶୀଘ୍ର ଭକ୍ତଙ୍କ ପାଇଁ ଉନ୍ମୁକ୍ତ ହେବ। ବଡ଼ଦାଣ୍ଡ ପୁଣିଥରେ ‘ଜୟ ଜଗନ୍ନାଥ ସ୍ବାମୀ’ ଧ୍ୱନିରେ ପ୍ରକମ୍ପିତ ହେବ। ପୁଣିଥରେ ଦହିବରା ପାଖରେ ଭିଡ଼ ଲାଗିବ ଓ ହକିର ସ୍ବାଭିମାନକୁ ଓଡ଼ିଶା ଫେରାଇ ଆଣିବ। ବାସ୍ ଏଥିପାଇଁ ଦିନ କେଇଟା ଆଉ ଅପେକ୍ଷା କରିବାକୁ ପଡ଼ିବ। ଏମିତି କିଛି କଥାକୁ ଗୀତ ଆକାରରେ ସଜାଇ ରାଜ୍ୟ ସରକାର ଓଡ଼ିଶାବାସୀଙ୍କ ଉଦ୍ଦେଶ୍ୟରେ ପ୍ରସ୍ତୁତ କରିଥିବାବେଳେ ଏହାର ରଚନା, ପ୍ରଯୋଜନା ସହ ନିର୍ଦ୍ଦେଶନା ଦେଇଛନ୍ତି ବିଶିଷ୍ଟ ଚଳଚ୍ଚିତ୍ର ନିର୍ମାତା ନୀଳମାଧବ ପଣ୍ଡା। ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ପ୍ରେମ୍ ଆନନ୍ଦ। ଏହାକୁ ସ୍ବରରେ ସଜାଇଛନ୍ତି କଣ୍ଠଶିଳ୍ପୀ ସବିଶେଷ ଓ ଦିପ୍ତୀରେଖା। ସୋସିଆଲ ମିଡ଼ିଆରେ ଭାଇରାଲ ହୋଇଥିବା ଏହି ଗୀତରେ ବହୁ ସେଲିବ୍ରିଟିଙ୍କୁ ଦେଖିବାକୁ ମିଳିଛି। କଳାକାରଙ୍କଠାରୁ ଆରମ୍ଭକରି କ୍ରୀଡାବିତ୍ଙ୍କ ପର୍ଯ୍ୟନ୍ତ ସମସ୍ତେ ନିଜ ଘରେ ମୋବାଇଲ୍ ମାଧ୍ୟମରେ ଭିଡ଼ିଓ କରି ଏଥିରେ ବାର୍ତ୍ତା ଦେଇଛନ୍ତି। ପଦ୍ମଶ୍ରୀ ହଳଧର ନାଗଙ୍କଠାରୁ ଆରମ୍ଭକରି ଚଳଚ୍ଚିତ୍ର ଅଭିନେତ୍ରୀ ବିଜୟଲକ୍ଷ୍ମୀ ପ୍ରହରାଜ, ଅପରାଜିତା ମହାନ୍ତି, ବର୍ଷା ପ୍ରିୟଦର୍ଶିନୀ, ଅର୍ଚ୍ଚିତା ସାହୁ, ଏଲିନା ସାମନ୍ତରାୟ, ପ୍ରକୃତି ମିଶ୍ର, ଅଭିନେତା ତଥା ଏମ୍ପି ଅନୁଭବ ମହାନ୍ତି, ବାବୁସାନ୍, ପ୍ରଜ୍ଞାରଞ୍ଜନ ଖଟୁଆ, ନୀଳମାଧବ ପଣ୍ଡା, କ୍ରୀଡାବିତ୍ ଦିଲୀପ ତିର୍କୀ, ଦୂତୀ ଚାନ୍ଦ, ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ପ୍ରମୁଖଙ୍କୁ ଏଥିରେ ଦେଖିବାକୁ ମିଳିଛି। ଶେଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମସ୍ତଙ୍କୁ ବାର୍ତ୍ତା ଦେଇଛନ୍ତି। ଏହି ଗୀତ କେବଳ ଓଡ଼ିଶାବାସୀଙ୍କ ମନରୁ ଭୟ ଦୂର କରିନି, ବରଂ ଏକାଠି ହୋଇ କରୋନା ମୁକାବିଲା କରିବାକୁ ସାହସ ଯୋଗାଇଛି।