କାବୁଲ,୧୪ା୫: ଆଫଗାନିସ୍ତାନ ରାଜଧାନୀ କାବୁଲର ପଶ୍ଚିମପାର୍ଶ୍ୱରେ ଥିବା ଏକ ହସ୍ପିଟାଲ ଉପରେ ଆତଙ୍କବାଦୀ ଆକ୍ରମଣ କରିବାରୁ ୧୬ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଦୁଇଜଣ ନବଜାତ ଶିଶୁ, ସେମାନଙ୍କ ମାଆ ଓ କେତେଜଣ ନର୍ସ ଅଛନ୍ତି। ସୁରକ୍ଷା କର୍ମୀ ଉକ୍ତ ପ୍ରସୂତି ହସ୍ପିଟାଲରୁ ଶିଶୁ ଓ ମାଆମାନଙ୍କୁ ଅନ୍ୟତ୍ର ନେଇଯାଇଥିଲେ। କାବୁଲରେ ଏହି ହସ୍ପିଟାଲ ଡକ୍ଟର୍ସ ଓ୍ବିଦାଉଟ୍ ବର୍ଡର ନାମକ ସହାୟତା ପ୍ରଦାନକାରୀ ସଂଗଠନ ଦ୍ୱାରା ଚାଲୁଥିଲା।
ମଙ୍ଗଳବାର କାବୁଲ ବାହାରେ ଦୁଇଟି ବିସ୍ଫୋରଣ ଘଟିଛି। ନଙ୍ଗରହାର ପ୍ରଦେଶରେ ଏକ ଅନ୍ତ୍ୟେଷ୍ଟିକ୍ରିୟା ବେଳେ ଆତ୍ମଘାତୀ ବିସ୍ଫୋରଣ ହେବାରୁ ୨୪ ଜଣ ପ୍ରାଣ ହରାଇଥିବାବେଳେ ୬୮ ଆହତ ହୋଇଛନ୍ତି। ସେହିପରି ଖୋଷ୍ଟ ପ୍ରଦେଶରେ ଥିବା ଏକ ବଜାରରେ ବିସ୍ଫୋରଣ ଯୋଗୁ ଜଣେ ଶିଶୁର ମୃତ୍ୟୁ ହେବା ସହ ୧୦ ଜଣ ଆହତ ହୋଇଛନ୍ତି। କାବୁଲରେ ତାଲିବାନ ଏବଂ ଆଇଏସ୍ ବାରମ୍ବାର ସେନା ଓ ସୁରକ୍ଷା ବଳକୁ ଟାର୍ଗେଟ କରୁଥିଲେ ହେଁ ହସ୍ପିଟାଲ ଆକ୍ରମଣ ଘଟଣାରେ କୌଣସି ସଂଗଠନ ନିଜକୁ ଦାୟୀ କରିନାହାନ୍ତି।
