ରିୟାଦ: କରୋନା ଭାଇରସ୍ ସମଗ୍ର ବିଶ୍ୱରେ କାୟା ବିସ୍ତାର କରିଚାଲିଛି। ଏହି ପରିସ୍ଥିତିରେ ଡାକ୍ତରମାନେ ରୋଗୀଙ୍କ ଜୀବନ ରକ୍ଷା କରିବା ପାଇଁ ନିଜ ଜୀବନକୁ ବାଜି ଲଗାଇ ଅବିରତ ସେବା ଯୋଗାଇ ଚାଲିଛନ୍ତି। ହସ୍ପିଟାଲରେ ଦୀର୍ଘ ସମୟ କାମ କରିବା ସମୟରେ ଡାକ୍ତରମାନେ ସଂକ୍ରମିତ ନ ଥିଲେ ମଧ୍ୟ ନିଜ ପରିବାରଠାରୁ ଦୂରେଇ ରହିବାକୁ ଏକପ୍ରକାର ବାଧ୍ୟ ହେଉଛନ୍ତି। ଏବେ ସୋସିଆଲ ମିଡିଆରେ ଭାଇରାଲ ହୋଇଥିବା ଏକ ଭିଡିଓ ଦେଖିଲେ ଆଖିରେ ଲୁହ ଆସିଯିବ।
ଏହି ଭିଡିଓକୁ ସାଉଦି ଆରବର ଜଣେ ବ୍ୟକ୍ତି ଶେୟାର କରିଛନ୍ତି। ଏଠାରେ ଜଣେ ଡାକ୍ତର କରୋନା ପୀଡ଼ିତଙ୍କ ଚିକିତ୍ସା କରି ଦୀର୍ଘଦିନ ପରେ ଘରକୁ ଫେରିଛନ୍ତି। ବାପା ଆସିଥିବାରୁ ଛୋଟ ପୁଅଟି ଧରିବା ପାଇଁ ଦୌଡୁଥିଲେ ମଧ୍ୟ ଡାକ୍ତର ଧରିବାକୁ ମନା କରୁଛନ୍ତି। ପିଲାଟି ସେଇଠି ଠିଆ ହେଇ ବାପାଙ୍କ ମୁହଁକୁ ଚାହିଁ ରହୁଛି। ଏହା ଦେଖି ଡାକ୍ତର ତଳେ ବସିପଡ଼ି କାନ୍ଦିବାରେ ଲାଗିଛନ୍ତି। ଏହି ଭିଡିଓରେ ୟୁଜରମାନେ ଭିନ୍ନ ଭିନ୍ନ ପ୍ରତିକ୍ରିୟା ଦେଇଛନ୍ତି। କର୍ତ୍ତବ୍ୟ ଆଗରେ ସତେ ଯେପରି ସ୍ନେହ ମମତା ହାର ମାନିଛି। ଆଉ କିଛି ୟୁଜର ଡାକ୍ତରଙ୍କୁ ପ୍ରକୃତ ହିରୋ ବୋଲି କହିଛନ୍ତି। ମାଇକ୍ ନାମକ ଜଣେ ଟୁଇଟର୍ ବ୍ୟବହାରକାରୀ ଏହି ଭିଡିଓ ଶେୟାର କରିଛନ୍ତି।