ଜି.ଉଦୟଗିରି,୧୭।୮(ଡି.ଏନ.ଏ.)-ଜି.ଉଦୟଗିରି ହସ୍ପିଟାଲରେ ଏକ ମୃତଦେହ ନେବାକୁ ନେଇ ମୃତକଙ୍କ ପରିବାର ଓ ହସ୍ପିଟାଲ କର୍ତ୍ତୃପକ୍ଷଙ୍କ ମଧ୍ୟରେ ଶୁକ୍ରବାର ଉତ୍ତେଜନା ଦେଖାଦେଇଥିଲା। ମୃତଦେହକୁ କୌଣସି ଯାନରେ ନେବାକୁ ନ ପାଇ ମୃତକଙ୍କ ପରିବାଲ ଲୋକେ ଏକ ବାଇକ୍ରେ ନେବାକୁ ଯାଉଥିଲେ। ଖବର ପାଇ ହସ୍ପିଟାଲ କର୍ତ୍ତୃପକ୍ଷ ପହଞ୍ଚି ମୃତ ଶରୀରକୁ ଆମ୍ବୁଲାନ୍ସ ଯୋଗେ ପଠାଇଥିଲେ। ଦୀର୍ଘ ୩ ଘଣ୍ଟା ଧରି ମୃତଦେହ ନେବା ପାଇଁ କାହିଁକି ବ୍ୟବସ୍ଥା କରାଗଲା ନାହିଁ ବୋଲି ମୃତକଙ୍କ ସମ୍ପର୍କୀୟମାନେ ପ୍ରଶ୍ନ କରିବାରୁ ଉତ୍ତେଜନା ସୃଷ୍ଟି ହୋଇଥିଲା। ପରେ ପୋଲିସ ପହଞ୍ଚି ବୁଝାଶୁଝା କରିବାରୁ ପରିବାର ଆମ୍ବୁଲାନରେ ମୃତଦେହ ନେଇଥିଲେ। ଜି.ଉଦୟଗିରି ଏନ୍ଏସି ତରଫରୁ ପୂର୍ବତନ ଏମ୍ପିଙ୍କ ଅନୁଦାନରୁ ୭ ଲକ୍ଷ ଟଙ୍କାରେ ଏକ ମହାପ୍ରୟାଣ ଗାଡ଼ି କିଣା ଯାଇଥିଲା। କିନ୍ତୁ ୬ ମାସ ହେବ ବ୍ୟବହାର ନ ହୋଇ ହସ୍ପିଟାଲ ପରିସରରେ ପଡ଼ି ରହିଛି।
ସୂଚନାପ୍ରକାରେ, କତିଙ୍ଗିଆର ସେବତୀ ପ୍ରଦାନ (୬୫)ଙ୍କ ସ୍ବାସ୍ଥ୍ୟ ଖରାପ ଥିବାରୁ ସକାଳୁ ପରିବାର ଲୋକେ ତାଙ୍କୁ ହସ୍ପିଟାଲରେ ଭର୍ତ୍ତି କରିଥିଲେ। ସେଠାରେ ତାଙ୍କର ମୃତ୍ୟୁ ଘଟିଥିଲା। ମୃତଦେହକୁ ନେବାକୁ କୌଣସି ଗାଡ଼ ନମିଳିବାରୁ ସମ୍ପର୍କୀୟମାନେ ମୃତଦେହ ଲୁଗାରେ ବାନ୍ଧି ବାଇକ୍ରେ ନେବା ପାଇଁ ବାହାରିଥିଲେ। ହସ୍ପିଟାଲର କର୍ତ୍ତୃପକ୍ଷ ମନା କରିଥିଲେ। ପରେ ଆମ୍ବୁଲାନ୍ସ ଯୋଗେ ମୃତଦେହକୁ କତିଙ୍ଗିଆକୁ ନିଆଯାଇଥିଲା। ଡ଼ାକ୍ତରମାନଙ୍କୁ ଜରୁରୀକାଳିନ ସେବାରେ ନିୟୋଜିତ କରାଯାଉ ନ ଥିବା ଓ ମହାପ୍ରୟାଣ ଗାଡ଼ି ଥାଇ ବ୍ୟବହାର ନ ହେବା ନେଇ ପୂର୍ବତନ କାଉନସିଲର ଜିତେନ୍ଦ୍ର ପ୍ରଧାନ କ୍ଷୋଭ ପ୍ରକାଶ କରିଥିଲେ । ଏ ନେଇ ହସ୍ପିଟାଲ ଇନଚାର୍ଜ ଡ. ଶଶିକାନ୍ତ ମଲିକଙ୍କୁ ପଚାରିବାରୁ ଡାକ୍ତରମାନେ ଠିକ ଭାବେ ଡ୍ୟୁଟି କରୁଛନ୍ତି। ମହାପ୍ରୟାଣ ଗାଡ଼ି ଏନ୍ଏସି କରିଛି। ବର୍ତ୍ତମାନ ରୋଗୀ କଲ୍ୟାଣ ସମିତିକୁ ବୁଝିବାକୁ କୁହାଯାଉଛି । ହସ୍ପିଟାଲରେ ଡ୍ରାଇଭର ରଖିବାକୁ ସେପରି ସମ୍ବଳ ନାହିଁ । ତେଣୁ ଆସନ୍ତା ୨୦ ତାରିଖରେ ବିଡିଓଙ୍କ ଅଧ୍ୟକ୍ଷତାରେ ଏକ ବୈଠକ ବସି ମହାପ୍ରୟାଣ ଗାଡ଼ି ସମ୍ପର୍କରେ ନିଷ୍ପତ୍ତି ନିଆଯିବ ବୋଲି କହିଥିଲେ।