ଧର୍ମଶାଳା/ଜେନାପୁର,୧୧।୧୨(ଡି.ଏନ୍.ଏ.)- ଜେନାପୁର ପୋଲିସ ମଙ୍ଗଳବାର ହାଇଓ୍ବା ଲୁଟ୍ ଅଭିଯୋଗରେ ୨ ଜଣ ଡ୍ରାଇଭରଙ୍କୁ ଗିରଫ କରି କୋର୍ଟ ଚାଲାଣ କରିଛି। ଏହି ଘଟଣାରେ ପୋଲିସ ଚୋରି ହୋଇଥିବା ୨ ହାଇଓ୍ବା ମଧ୍ୟରୁ ଗୋଟିଏ ଜବତ କରିଥିବାବେଳେ ଅନ୍ୟଟିର ଡାଲା ଏବଂ ୧ ଲକ୍ଷ ଟଙ୍କା ଜବତ କରିଛି। ଅଭିଯୁକ୍ତ ଦ୍ୱୟ ହେଲେ ପୁରୀ ଜିଲା ଅନ୍ତର୍ଗତ କଣାସ ଥାନା ଅଧୀନ ନନ୍ଦରଗସ୍ତା ଗଡସେଣପୁର ଗ୍ରାମର ସନ୍ୟାସି ମହାରଣା(୨୪) ଓ ନିମାପଡ଼ା ଥାନା ଅଧୀନ ଢ଼େଇଗାଁ ଗ୍ରାମର ପ୍ରଭାକର ମଲ୍ଲିକ (୩୪)। ଏମାନେ ଗାଡି ୨ଟିକୁ ଚୋରିକରି ଲୁଟ୍ର ରୂପ ଦେଇଥିବା ପୋଲିସ ଆଗରେ ସ୍ବୀକାର କରିଥିବା ଜେନାପୁର ଥାନାରେ ଆୟୋଜିତ ଖବରଦାତା ସମ୍ମିଳନୀରେ ଯାଜପୁର ରୋଡ୍ ଏସ୍ଡିପିଓ ଚିନ୍ମୟ ନାୟକ ସୂଚନା ଦେଇଛନ୍ତି। ଘଟଣାରେ ସମ୍ପୃକ୍ତ ଅନ୍ୟଜଣେ ଅଭିଯୁକ୍ତ ଖୋର୍ଦ୍ଧା ଜିଲା ଜଟଣୀ ଥାନା ଅଧୀନ ସାହାସାହା ଜାଦନ୍ ଓରଫ (ରାଜା)ଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି କହିଛନ୍ତି।
ପ୍ରକାଶ ଯେ, ଗତ ୫ ତାରିଖ ରାତିରେ ଜେନାପୁର ଥାନା ଅଧୀନ ୫୩ ନମ୍ବର ଜାତୀୟ ରାଜପଥ ଚଢେଇଧରା ଛକ ନିକଟରୁ ୬ଜଣ ଦୁର୍ବୃତ୍ତ ବନ୍ଧୁକ ଦେଖାଇ ୨ ହାଇୱା ଗାଡି ଲୁଟି ନେଇଥିବା ଶନ୍ୟାସୀ ଓ ପ୍ରଭାକର ଗାଡି ମାଲିକଙ୍କୁ ଜଣାଇଥିଲେ। ଏ ସମ୍ପର୍କରେ ୬ ତାରିଖରେ ଗାଡି ମାଲିକ ଜେନାପୁର ଥାନାରେ ଅଭିଯୋଗ କରିଥିଲେ। ଏ ନେଇ ଏକ ମାମଲା (ନଂ. ୨୮୧/୧୯) ରୁଜୁ କରି ଥାନାଧିକାରୀ ସୁଶାନ୍ତ କୁମାର ଦାସ ଘଟଣାର ତଦନ୍ତ ଚଳାଇଥିଲେ। ତଦନ୍ତବେଳେ ଡ୍ରାଇଭର ଦ୍ୱୟଙ୍କୁ ଘଟଣା ସମ୍ପର୍କରେ ପଚାରିବାରେ ସେମାନଙ୍କ ବୟାନକୁ ନେଇ ପୋଲିସର ସନ୍ଦେହ ସୃଷ୍ଟି ହୋଇଥିଲା ା ଉଭୟ ଡ୍ରାଇଭରଙ୍କୁ ଥାନାରେ ଅଟକ ରଖି ପଚରାଉଚରା ବେଳେ ଗାଡି ୨ଟିକୁ ଚୋରି କରିବା ପରେ ରାଜାଙ୍କୁ ସାଢ଼େ ୩ ଲକ୍ଷ ଟଙ୍କାରେ ବିକ୍ରି କରିଥିବା ସ୍ବୀକାର କରିଥିଲେ। ଏହାପରେ ପୋଲିସ ରାଜାଙ୍କ କବାଡ଼ିଆ ଦୋକାନରେ ଚଢାଉକରି ୧ ହାଇଓ୍ବା ଜବତ କରିଥିବା ବେଳେ ଅନ୍ୟ ଏକ ହାଇଓ୍ବାର ଡାଲା ଜବତ କରିଥିଲା।