କଟକ ଅଫିସ,୨୪ା୧୨- ପୁରୀ ଶ୍ରୀମନ୍ଦିର ଓ କୋଣାର୍କ ସୂର୍ଯ୍ୟମନ୍ଦିର ମରାମତି ମାମଲାରେ ଭାରତୀୟ ପ୍ରତ୍ନତାତ୍ତ୍ବିକ ସର୍ବେକ୍ଷଣ ସଂସ୍ଥା(ଏଏସ୍ଆଇ)ର ଡିଜି ଉଷା ଶର୍ମା ସୋମବାର ହାଇକୋର୍ଟରେ ବ୍ୟକ୍ତିଗତ ଭାବେ ହାଜର ହୋଇଛନ୍ତି। ଶର୍ମାଙ୍କ ସହିତ ସଂସ୍ଥାର ଯୁଗ୍ମ ନିର୍ଦ୍ଦେଶକ(ସଂରକ୍ଷଣ) ଓ ଓଡ଼ିଶା ଅଧୀକ୍ଷକ ମଧ୍ୟ ହାଜର ହୋଇଥିଲେ। ଆସନ୍ତା ୪ ମାସ ମଧ୍ୟରେ ଉଭୟ ମନ୍ଦିରର ମରାମତି କାର୍ଯ୍ୟ ଶେଷ କରିବାକୁ ଏଏସ୍ଆଇ ଅଧିକାରୀମାନେ ହାଇକୋର୍ଟଙ୍କୁ ପ୍ରତିଶ୍ରୁତି ଦେଇଛନ୍ତି। ତେବେ ମରାମତି ନିମନ୍ତେ ସେମାନେ ହାଇକୋର୍ଟଙ୍କ ଦ୍ୱାରା ନିଯୁକ୍ତ ଆମିକସ୍କ୍ୟୁରୀ ଏବଂ ବିଶେଷଜ୍ଞମାନଙ୍କ ମତାମତ ଓ ପରାମର୍ଶ ନେବାକୁ କୋର୍ଟ ଆଦେଶ ଦେଇଛନ୍ତି। ଏପରି କି ଆବଶ୍ୟକସ୍ଥଳେ ସରକାରଙ୍କ ସହାୟତା ନେବାକୁ ମଧ୍ୟ ଆଦେଶରେ କୁହାଯାଇଛି। ଆସନ୍ତା ମେ ୪ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ। ଉକ୍ତ ଦିନ ଏଏସ୍ଆଇ ଅଧିକାରୀମାନେ ମରାମତି ସମ୍ପର୍କିତ ରିପୋର୍ଟ ହାଇକୋର୍ଟରେ ଦାଖଲ କରିବେ ବୋଲି ମୁଖ୍ୟ ବିଚାରପତି ଜଷ୍ଟିସ କେ.ଏସ୍. ଝାବେରୀ ଓ ବିଚାରପତି ଜଷ୍ଟିସ କେ.ଆର. ମହାପାତ୍ରଙ୍କୁ ନେଇ ଗଠିତ ଖଣ୍ଡପୀଠ ଆଦେଶ ଦେଇଛନ୍ତି। ଅନ୍ୟପକ୍ଷରେ କୋଣାର୍କ ମାମଲା ଉପରେ ଆବେଦନକାରୀ ଦିଲୀପ ମହାପାତ୍ର ଆଉ ଏକ ଅନ୍ତରୀଣ ପିଟିଶନ ଦାଏର କରିଛନ୍ତି। ପିଟିଶନରେ ସେ କୋଣାର୍କକୁ ନବଗ୍ରହ ମୂର୍ତ୍ତି ଫେରାଇ ଆଣିବା ପାଇଁ ଦାବି କରିଛନ୍ତି। ଉକ୍ତ ମୂର୍ତ୍ତିଗୁଡ଼ିକ ଏବେ ଲଣ୍ଡନର ଏକ ସଂଗ୍ରହାଳୟରେ ରହିଛି। ମହାପାତ୍ର ଦର୍ଶାଇଛନ୍ତି, ଉକ୍ତ ନବଗ୍ରହ ମୂର୍ତ୍ତି ମଧ୍ୟରେ ସୂର୍ଯ୍ୟଙ୍କର ମୂର୍ତ୍ତି ରହିଛି। ତେଣୁ ଉକ୍ତ ମୂର୍ତ୍ତିଗୁଡ଼ିକ ଫେରସ୍ତ ଅଣାଗଲେ କୋଣାର୍କର ଶୋଭା ଅଧିକ ବୃଦ୍ଧି ପାଇବ। ସେହିପରି ମହାପାତ୍ର ଦର୍ଶାଇଛନ୍ତି, ରଙ୍ଗନାଥ ସ୍ବାମୀ ମନ୍ଦିର ମରାମତି ପାଇଁ ମାତ୍ର ୧୬ ମାସ ସମୟ ଲାଗିଥିଲା। ମନ୍ଦିରରୁ ୫୦ହଜାର ଟନ୍ ଆବର୍ଜନା ବାହାରିଥିଲା। ଏତେ କମ୍ ସମୟ ମଧ୍ୟରେ ମନ୍ଦିର ମରାମତି ଶେଷ କରାଯାଇଥିବାରୁ ୟୁନେସ୍କୋ ପୁରସ୍କାର ମିଳିଥିଲା। ମାତ୍ର ଶ୍ରୀମନ୍ଦିର ଓ ସୂର୍ଯ୍ୟମନ୍ଦିର ମରାମତି ପାଇଁ ୨୦୧୦ରୁ କାମ ଜାରି ରହିଛି। ବିଭିନ୍ନ ବାହାନା ଦେଖାଇ ଏହି କାମକୁ ଶେଷ କରାଯାଉନାହିଁ। ଅର୍ଥାତ୍ ଏଥିପ୍ରତି ସରକାର କିମ୍ବା ଏଏସ୍ଆଇ ଯତ୍ନବାନ ରହୁନାହାନ୍ତି। ସୂଚନାଥାଉ କି, ଶ୍ରୀମନ୍ଦିରକୁ ନେଇ ଅଭିଷେକ ଦାସ ଓ ସୂର୍ଯ୍ୟମନ୍ଦିରକୁ କୋଣାର୍କକୁ ନେଇ ଦିଲୀପ ମହାପାତ୍ର ହାଇକୋର୍ଟରେ ମାମଲା ରୁଜୁ କରିଥିଲେ। ଉଭୟ ମାମଲାକୁ ବରିଷ୍ଠ ଆଡଭୋକେଟ ଅଶୋକ ମହାପାତ୍ର ପରିଚାଳନା କରୁଛନ୍ତି।