ସାଂଘାଇ, ୭ା୪ (ଏ.ଏଫ୍.ପି)- ବିଶ୍ୱର ବିଶିଷ୍ଟ ହାଇଜମ୍ପର ଚାଇନାର ଝାଙ୍ଗ୍ ଗୁଓଇଙ୍କୁ ଆକସ୍ମିକ ଅବସର ନିଷ୍ପତ୍ତି ତାଙ୍କ ସମର୍ଥକମାନଙ୍କୁ ବିସ୍ମିତ କରିଛି। ୨୦୧୫ରେ ବେଜିଂରେ ଅନୁଷ୍ଠିତ ବିଶ୍ୱ ଚାମ୍ପିୟନଶିପ୍ରେ ରୌପ୍ୟ ବିଜୟୀ ଝାଙ୍ଗ୍ଙ୍କ ବୟସ ହେଉଛି ମାତ୍ର ୨୮ବର୍ଷ। ସେ ୨୦୧୨ ଲଣ୍ଡନ ଏବଂ ୨୦୧୬ ରିଓ ଅଲିମ୍ପିକ୍ସରେ ମଧ୍ୟ ଭାଗ ନେଇଥିଲେ। ଟୁଇଟରରେ ଏହା ହାଇଜମ୍ପରଙ୍କର ୩.୪ ନିୟୁତ ଫଲୋଅର ରହିଛନ୍ତି। ସେ ତାଙ୍କ ସମର୍ଥକମାନଙ୍କୁ କହିଛନ୍ତି, ମୁଁ ଆଉ ପୂର୍ବଭଳି ଜମ୍ପ୍ କରିପାରୁ ନାହିଁ। ତେଣୁ ଖେଳରୁ ଅବସର ଘୋଷଣା କରୁଛି। ଏଥିପାଇଁ ମୁଁ ଦୁଃଖିତ। ସୂଚନାଯୋଗ୍ୟ, ଗତ ଫେବୃୟାରୀରେ ଇଟାଲିର ସିଏନାଠାରେ ଚଳିତ ସିଜନରେ ତାଙ୍କ ଶ୍ରେଷ୍ଠ ପ୍ରଦର୍ଶନ କରିଥିଲେ। ସେ ୨.୨୮ ମିଟର ଜମ୍ପ୍ କରି ପାରିଥିଲେ। ଟୋକିଓ ଅଲିମ୍ପିକ୍ସ ପାଇଁ ଯୋଗ୍ୟତା ମାନଦଣ୍ଡ (୨.୩୩ ମିଟର)ଠାରୁ ସେ ପଛରେ ରହିଥିଲେ। କରୋନା ଭାଇରସ ମହାମାରୀ ଯୋଗୁ ଟୋକିଓ ଗେମ୍ସ ୨୦୨୧ ଗ୍ରୀଷ୍ମଋତୁକୁ ଘୁଞ୍ଚତ୍ୟାଇଛି। ଝାଙ୍ଗ ଗତବର୍ଷ ଚାଇନିଜ୍ ଆଥଲେଟିକ୍ସ ପାଇଁ ଉଦ୍ଦିଷ୍ଟ କଡ଼ା ଆଇନର ଉଲ୍ଲଂଘନ କରି ବ୍ୟବସାୟିକ କାର୍ଯ୍ୟକଳାପରେ ସମ୍ପୃକ୍ତ ହୋଇଥିବାରୁ ମାର୍ଚ୍ଚରେ ସସ୍ପେଣ୍ଡ ହୋଇଥିଲେ। ପୁନଶ୍ଚ ବର୍ତ୍ତମାନ ତାଙ୍କର ଖରାପ ଫର୍ମ ଯୋଗୁ ଜାତୀୟ ଦଳକୁ ପ୍ରତ୍ୟାବର୍ତ୍ତନ ଆଶା କ୍ଷୀଣ ମନେ ହେଉଥିଲା।