ଗୋପାଳପୁର/କନିଷି,୧୮।୨(ଡି.ଏନ୍.ଏ.): ଗଞ୍ଜାମ ଜିଲା ୧୬ ନଂ. ଜାତୀୟ ରାଜପଥ ଗୋଳନ୍ଥରା ଚଟି ଛକରେ ସୋମବାର ମଧ୍ୟରାତ୍ରରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି। ଏଥିରେ ଦୁଇ ଯୁବକଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ହୋଇଥିବା ଜଣାପଡ଼ିଛି। ମୃତକମାନେ ହେଲେ ଗୋଳନ୍ଥରା ଥାନା ଅଧୀନ ନିମକୁଡିଆ ଗ୍ରାମର କାଳିଆ ପ୍ରଧାନ (୨୮), ବିହାର ରାଜ୍ୟର ସମସ୍ତିପୁର ଜିଲା ବାଦଘାଟ ଅଞ୍ଚଳର ଗଣେଶ ଚୌଧୁରୀ (୨୯) ଏବଂ ଗୁରୁତର ହେଲେ ଭାଲିଆଗଡ ଗ୍ରାମର ଏ.କ୍ରିଷ୍ଣା ଦୋରା।
ପୋଲିସ ସୂଚନାନୁଯାୟୀ, ସୋମବାର ରାତିରେ କାଳିଆ, ଗଣେଶ ଓ କ୍ରିଷ୍ଣା ତିନି ଜଣ ବ୍ରହ୍ମପୁରରୁ କାମ ସାରି ଏକ ବାଇକ୍ରେ ସୋରଳ ଜଙ୍କଶନ୍କୁ ଫେରୁଥିଲେ। ଏହି ସମୟରେ ଗୋଳନ୍ଥରା ଚଟି ଛକ ନିକଟରେ ଛିଡାହୋଇଥିବା ଏକ ଚିପ୍ସ ବୋଝେଇ ହାଇୱାକୁ ପଛପଟୁ ବାଇକଟି ଭାରସାମ୍ୟ ହରାଇ ଧକ୍କା ଦେଇଥିଲା। ଖବରପାଇ ଗୋଳନ୍ଥରା ଥାନାଧିକାରୀ ବାବୁଲି ନାୟକ ଓ ଅନ୍ୟ ପୋଲିସ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ ଗ୍ରାମବାସୀଙ୍କ ସହଯୋଗରେ କାଳିଆ, ଗଣେଶ ଓ କ୍ରିଷ୍ଣାଙ୍କୁ ଉଦ୍ଧାର କରି ବ୍ରହ୍ମପୁର ବଡ ମେଡିକାଲରେ ଭର୍ତ୍ତି କରିଥିଲେ। ସେଠାରେ ଡାକ୍ତର କାଳିଆ ଓ ଗଣେଶଙ୍କୁ ମୃତ ଘୋଷଣା କରିଥିବା ବେଳେ କ୍ରିଷ୍ଣାଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡମେଡିକାଲକୁ ସ୍ଥାନାନ୍ତର କରାଯାଇଥିବା ଜଣାପଡିଛି। ଏ ନେଇ ଥାନାରେ କେସ ନଂ ୪୮/୨୦ରେ ଏକ ମାମଲା ରୁଜୁ କରି ପୋଲିସ ଘଟଣାର ତଦନ୍ତ ଚଳାଇଥିବା ବେଳେ ହାଇୱା ଓ ବାଇକକୁ ଜବତ କରିଥିବା ଥାନାଧିକାରୀ ନାୟକ ସୂଚନା ଦେଇଛନ୍ତି।
