ଓ୍ବାଶିଂଟନ/ନୂଆଦିଲ୍ଲୀ,୨୨-୯: ଆମେରିକାର ହ୍ୟୁଷ୍ଟନରେ ‘ହାଉଡି ମୋଦି’ କାର୍ଯ୍ୟକ୍ରମ ପରେ ଜାତିସଂଘ ସାଧାରଣ ପରିଷଦ ବୈଠକ ବେଳେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ଏକ ସୀମିତ ବାଣିଜ୍ୟ ଚୁକ୍ତି ହୋଇପାରେ। ଦୁଇ ଦେଶ ମଧ୍ୟରେ ଏନେଇ ଆଲୋଚନା ଶେଷ ପର୍ଯ୍ୟାୟରେ ପହଞ୍ଚତ୍ଛି ବୋଲି ଜଣେ ଅଧିକାରୀ ପ୍ରକାଶ କରିଛନ୍ତି।
ଆମେରିକା ନିର୍ବାଚନ ପୂର୍ବରୁ ଚାଇନା ସହ ବାଣିଜ୍ୟ ଚୁକ୍ତି ପାଇଁ ଟ୍ରମ୍ପ ଆଗ୍ରହ ପ୍ରକାଶ କରିଥିଲେ। ଏଥିନେଇ ଦୁଇ ଦେଶ ମଧ୍ୟରେ ଆଲୋଚନା ଆରମ୍ଭ ହୋଇଥିଲା। ଇତିମଧ୍ୟରେ ଦୁଇ ଦେଶ ମଧ୍ୟରେ ଦୀର୍ଘ ଦିନ ହେବ ବାଣିଜ୍ୟ ଯୁଦ୍ଧ ଆରମ୍ଭ ହୋଇଯାଇଛି। ପ୍ରାପ୍ତ ସୂଚନାନୁଯାୟୀ, ଆସନ୍ତା ସପ୍ତାହରେ ଜାପାନ ପ୍ରଧାନମନ୍ତ୍ରୀ ଶିଞ୍ଜୋ ଆବେଙ୍କ ସହ ଟ୍ରମ୍ପ ଏଭଳି ଏକ ବାଣିଜ୍ୟ ଚୁକ୍ତି କରିବାକୁ ଯାଉଛନ୍ତି। ଫଳରେ ଜାପାନୀ ଉତ୍ପାଦ ଉପରେ ଆମେରିକା ଶୁଳ୍କ ହ୍ରାସ କରିବ। ଅଧିକାରୀଙ୍କ କହିବାନୁଯାୟୀ, ଭାରତ ସହିତ ସୀମିତ ବାଣିଜ୍ୟ ଚୁକ୍ତି ହେବା ପରେ ଆମେରିକାର କେତେକ ଉତ୍ପାଦ ଉପରେ ଭାରତ ଶୁଳ୍କ ହ୍ରାସ କରିବ। ସେହିପରି କେତେକ ଭାରତୀୟ ଉତ୍ପାଦ ଉପରେ ଆମେରିକା ଜେନେରାଲାଇଜ୍ଡ ସିଷ୍ଟମ ଅଫ୍ ପ୍ରିଫରେନ୍ସେସ୍(ଜିଏସ୍ପି)କୁ ପୁନର୍ବାର ଲାଗୁ କରିବ। ସୂଚନାଥାଉ କି, ହାର୍ଲେ ଡାଭିଡସନ ବାଇକ୍ ଉପରେ ଭାରତ ଅଧିକ ଟାରିଫ୍ ଆଦାୟ କରୁଛି ବୋଲି ଟ୍ରମ୍ପ ଅଭିଯୋଗ କରି ଏହାକୁ ୫୦%କୁ ହ୍ରାସ କରିବା ଲାଗି ସେ ଦାବି କରୁଛନ୍ତି। ସେହିଭଳି ଭାରତ ପକ୍ଷରୁ ଜାରି କରାଯାଇଥିବା ନୂଆ ଇ-କମର୍ସ ନିୟମକୁ ନେଇ ମଧ୍ୟ ଭାରତ ସହ ଆମେରିକାର ମତବିରୋଧ ରହିଛି। ଆମାଜନ, ଓ୍ବାଲମାର୍ଟ ଭଳି କମ୍ପାନୀଙ୍କ ସ୍ବାର୍ଥକୁ ଭାରତୀୟ ଇ-କମର୍ସ ନିୟମ ବିରୋଧାଚରଣ କରୁଛି ବୋଲି ଟ୍ରମ୍ପ ଅଭିଯୋଗ କରିଛନ୍ତି। ସୂଚନାଥାଉ କି, ନିକଟରେ ଭାରତର ବୈଦେଶିକ ମନ୍ତ୍ରୀ ଏସ୍.ଜୟଶଙ୍କର କହିଥିଲେ ଯେ, ବାଣିଜ୍ୟ ବିବାଦର ସମାଧାନ ନେଇ ଆମେିରକା ସହ ଆଲୋଚନା ଚାଲିଛି। କେତେକ ବିବାଦ ଏପରି ରହିଛି ଯାହାର ସମାଧାନ ନିକଟରେ ହୋଇପାରିବ ବୋଲି ତାଙ୍କର ଆଶା ଥିବା ଜୟଶଙ୍କର କହିଛନ୍ତି। ପ୍ରାପ୍ତ ସୂଚନାରୁ ଜଣାପଡିଛି ଯେ, ରାଷ୍ଟ୍ରପତି ଟ୍ରମ୍ପ ଭାରତ ଠାରୁ ଆମେରିକାର ଶୀର୍ଷ କମ୍ପାନୀଙ୍କ ଲାଗି ଏକ ଉନ୍ନତ ବାଣିଜ୍ୟ ସର୍ତ୍ତ ଚାହୁଁଛନ୍ତି। ଭାରତ ସହ ପୂର୍ବର ଚୁକ୍ତି ଯୋଗୁ ଆମେରିକାର ବିିନିର୍ମାଣ କ୍ଷେତ୍ରରେ ଲକ୍ଷ ଲକ୍ଷ ନିଯୁକ୍ତି ଚାଲିଯାଇଛି ବୋଲି ସେ ଅଭିଯୋଗ କରିଥିଲେ। ସୂଚନାଥାଉ କି, ଗତବର୍ଷ ଆମେରିକା ସହିତ ଭାରତର ଦ୍ୱିପାକ୍ଷିକ ବାଣିଜ୍ୟ କାରବାର ମାତ୍ର ୧୪୨ ବିଲିୟନ ଡଲାର ଥିଲା, ଯାହା କି ଏହାର ଚାଇନା ସହ ୭୩୭ ବିଲିୟନ ଡଲାରର ଏକ ଛୋଟ ଅଂଶବିଶେଷ ରହିଛି।