ହାଟଡିହୀ, ୨୮।୪(ଡି.ଏନ.ଏ.)-ବାହାର ରାଜ୍ୟ ଫେରନ୍ତାଙ୍କୁ ନେଇ ଜିଲା ପ୍ରଶାସନର ତତ୍ପରତା ପ୍ରକାଶ ପାଇଛି। ତେଣୁ ସେମାନଙ୍କୁ ଥଇଥାନ ପାଇଁ ପ୍ରୟାସ ଆରମ୍ଭ ହୋଇଛି। କେନ୍ଦୁଝର ଜିଲା ହାଟଡିହୀ ବ୍ଲକରେ ଥିବା ଆଦର୍ଶ ବିଦ୍ୟାଳୟରେ ଅସ୍ଥାୟୀ କୋଭିଡ ମେଡିକାଲ କ୍ୟାମ୍ପ ଖୋଲିବ। ଗତ ସୋମବାର ହାଟଡିହୀ ବ୍ଲକ ତରଫରୁ ଚିଠି ନମ୍ବର ୧୪୦୧ରେ ଉକ୍ତ କ୍ୟାମ୍ପ ଖୋଲିବା ଲାଗି ନିର୍ଦ୍ଦେଶ ହୋଇଛି। ଏଥିପାଇଁ ପ୍ରସ୍ତୁତି ଆରମ୍ଭ ହୋଇଛି। ମଙ୍ଗଳବାର ବ୍ଲକ ପ୍ରଶାସନ କର୍ମଚାରୀ ଓ ସରପଞ୍ଚ ବିଦ୍ୟାଳୟ ପରିଦର୍ଶନ କରିଛନ୍ତି। ବିଦ୍ୟାଳୟର ଅଧ୍ୟକ୍ଷଙ୍କ ସହ ଆଲୋଚନା କରି ବିଭିନ୍ନ ପରିସ୍ଥିତିକୁ ଅନୁଧ୍ୟାନ କରିଛନ୍ତି। ଜମ୍ଭୀରା ସରପଞ୍ଚ ଆଶାଲତା ସା, ଢେଙ୍କା ସରପଞ୍ଚ ନିମାଇଁ ସାମଲ, ଜିଆରଏସ ମଧୁଛନ୍ଦା ଗିରି, ସୁରେଶ ସେଠି, ପ୍ରଫୁଲ୍ଲ ମାଝୀ,ପିଇଓ ନରହରି ନାୟକ ପ୍ରମୁଖ ବିଦ୍ୟାଳୟର ଅଧ୍ୟକ୍ଷ ସୁଦାମ ବାରିକଙ୍କ ସହ ଏନେଇ ସମସ୍ତ ଆଲୋଚନା କରିଛନ୍ତି। ବିଦ୍ୟାଳୟର ୨୪ଟି ଗୃହକୁ କୋଭିଡ-୧୯ ଗୃହ ଲାଗି ସ୍ଥିରୀକୃତ କରାଯାଇଛି।
