ରତ୍ନଗିରି, (ଡି.ଏନ୍.ଏ.)/ବରୀ, (ସ୍ବ.ପ୍ର.) ୨୭।୪-ଯାଜପୁର ଜିଲାରେ ଦିନକୁ ଦିନ କରୋନା ସଂକ୍ରମିତଙ୍କ ସଂଖ୍ୟା ବଢ଼ି ବଢ଼ି ଚାଲିଥିବା ବେଳେ ସୋମବାର ମଧ୍ୟାହ୍ନ ୧୨ଟା ଠାରୁ ଯାଜପୁର ଜିଲାର କେତେକ ବ୍ଲକ ଓ ଯାଜପୁର ପୌରାଞ୍ଚଳକୁ କଣ୍ଟେନମେଣ୍ଟ ଜୋନ୍ ଘୋଷଣା କରାଯିବା ସହ ସଟ୍ଡାଉନ୍ ଭଳି ସ୍ଥିତି ବଳବତ୍ତର ରହିବ ବୋଲି ଜିଲା ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି। ହେଲେ ସୋମବାର ବରୀମାଉଣ୍ଡ ସାପ୍ତାହିକ ହାଟରେ ନାହିଁ ନ ଥିବା ଭିଡ଼ ଦେଖିବାକୁ ମିଳିଥିଲା। ୨ ଦିନ ପାଇଁ ସଟ୍ଡାଉନ୍ କରାଯାଉଥିବାରୁ ହାଟରେ ଶତାଧିକ ଲୋକ ଏକାଠି ହୋଇ ପରିବା କିଣୁଥିବା ଦେଖାଯାଇଥିଲା। କୃପାସିନ୍ଧୁ ବିଦ୍ୟାଭବନ ଖେଳ ପଡିଆରେ ଏହି ହାଟ ଚାଲିଥିବା ବେଳେ ଲୋକମାନେ ସାମଜିକ ଦୂରତ୍ୱ ଭୁଲି ଯାଇ କିଣା କିଣି କରୁଥିବା ଦେଖିବାକୁ ମିଳିଥିଲା। ଏହାଛଡ଼ା ବରୀ ମାଉଣ୍ଡଠାରୁ ବ୍ଲକ କାର୍ଯ୍ୟାଳୟକୁ ସଂଯୋଗ କରୁଥିବା ରାସ୍ତାର ଉଭୟ ପାର୍ଶ୍ୱରେ ବହୁ ସଂଖ୍ୟକ ବାଇକ ରଖାଯାଇଥିବାରୁ କିଛି ସମୟ ଧରି ଆମ୍ବୁଲାନ୍ସ ମଧ୍ୟ ଅଟକି ରହିଥିଲା। ଭିଡ଼ କମ୍ କରିବାକୁ ଦାୟିତ୍ୱରେ ଥିବା ପୋଲିସ କର୍ମଚାରୀଙ୍କୁ ନାକେଦମ୍ ହେବାକୁ ପଡିଥିଲା। ଆଗାମୀ ଦିନରେ ସମଦୂରତ୍ୱ ରକ୍ଷା କ୍ଷେତ୍ରରେ ସାପ୍ତାହିକ ହାଟକୁ ଆସୁଥିବା ବାଇକ ଆରୋହୀଙ୍କ ଉପରେ କଡା ନଜର ରଖିବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
ସୂଚନାଯୋଗ୍ୟ, ଯାଜପୁରରେ ଚିହ୍ନଟ ହୋଇଥିବା କରୋନା ସଂକ୍ରମିତଙ୍କ ମଧ୍ୟରୁ ଅଧିକାଂଶ ପଶ୍ଚିମବଙ୍ଗ ଫେରନ୍ତା। ତେବେ ସୋମବାର ବରୀମାଉଣ୍ଡ ସାପ୍ତାହିକ ହାଟରେ କେତେଜଣ ପଶ୍ଚିମବଙ୍ଗ ଫେରନ୍ତା ପରିବା କିଣୁଥିବା ଚର୍ଚ୍ଚା ହେଉଛି।