?????????????????????????????????
ଭୁବନେଶ୍ୱର,୧୪।୩(ବ୍ୟୁରୋ): ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ବାଚସ୍ପତି ସୂର୍ଯ୍ୟ ନାରାୟଣ ପାତ୍ର, ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ(ସିଏମ୍ଓ)ର ଅଧିକାରୀ, ମନ୍ତ୍ରୀପରିଷଦର ସଦସ୍ୟ ଏବଂ ବିଧାୟକ ଗଣ ସମସ୍ତେ ଶୁକ୍ରବାର ଅପରାହ୍ନରେ ଓଡ଼ିଶା ବିଧାନସଭା ପରିସରରେ ଏକାଠି ହୋଇଥିଲେ। ହେଲେ ନା ହୋଇଥିଲା ବିତର୍କ ନା ରାଜନୈତିକ ବୟାନବାଜି। ପ୍ରସ୍ତୁତ ରହିଥିଲା ହାତ ଧୋଇବା ପାଇଁ ବେସିନ୍ ଆବଶ୍ୟକ ହ୍ୟାଣ୍ଡୱାଶ ଏବଂ ତଉଲିଆ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ଅନ୍ୟମାନେ ହ୍ୟାଣ୍ଡୱାଶ୍, ସାନିଟାଇଜର ବ୍ୟବହାର କରି ହାତ ଧୋଇଥିଲେ। ବାରମ୍ବାର ହାତ ଧୋଇବା ଦ୍ୱାରା କୋରନା ସଂକ୍ରମଣରୁ ରକ୍ଷା ପାଇ ହେବ। ମୁଖ୍ୟମନ୍ତ୍ରୀଙ୍କ ଏହି ବାର୍ତ୍ତାକୁ ସମସ୍ତେ ପାଳନ କରିଥିଲେ। ଏହାକୁ ନିଜ ନିଜ ନିର୍ବାଚନମଣ୍ଡଳୀ ପ୍ରୟୋଗ ସହ ସାଧାରଣ ଜନସାଧାରଣଙ୍କୁ ସଚେତନତା କରିବା ପାଇଁ ମୁଖ୍ୟମନ୍ତ୍ରୀ ପରାମର୍ଶ ଦେଇଥିଲେ। ରାଜ୍ୟରେ ପ୍ରଚଳିତ ସଂଘୀୟ ବ୍ୟବସ୍ଥାରେ ବିଧାନସଭା ଗଣତନ୍ତ୍ରର ମନ୍ଦିର ସଦୃଶ। ଏହିଠାରୁ ସ୍ବଚ୍ଛତାର ବାର୍ତ୍ତା ରାଜ୍ୟବାସୀଙ୍କ ପ୍ରେରଣା ଦେବ ବୋଲି ସମସ୍ତେ ଆଶାବାଦୀ।
ଏହି ହାତଧୁଆ କାର୍ଯ୍ୟକ୍ରମ ପୂର୍ବରୁ ବାଚସ୍ପତି ସୂର୍ଯ୍ୟ ନାରାୟଣ ପାତ୍ରଙ୍କ ଅଧ୍ୟକ୍ଷତାରେ ଏକ କରୋନା ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବେ ଯୋଗଦେଇଥିଲେ। ବୈଠକରେ ବାଚସ୍ପତି ପାତ୍ର କହିଥିଲେ ଯେ, ବର୍ତ୍ତମାନ ସାରା ପୃଥିବୀ କରୋନା ଭୂତାଣୁ (କୋଭିଡ-୧୯) ସଂକ୍ରମଣରେ କବଳିତ। ତେଣୁ ଏହାର ପ୍ରତିଷେଧକ ଆପଣାଇବା ନିହାତି ଜରୁରୀ। ପଡ଼ୋଶୀ ଚାଇନାରେ ମହାମାରୀରେ ପରିଣତ ହୋଇଥିବା ଏହି ଭୂତାଣୁ ଭାରତରେ ବ୍ୟାପିବାର ଯଥେଷ୍ଟ ସମ୍ଭାବନା ରହିଛି। ବିଶ୍ୱ ସ୍ବାସ୍ଥ୍ୟ ସଙ୍ଗଠନର ପରାମର୍ଶକ୍ରମେ ଏହା ଯେପରି ନ ବ୍ୟାପେ, ସେଥିପ୍ରତି ପ୍ରତିଷେଧକ ବ୍ୟବସ୍ଥା ଗ୍ରହଣ କରାଯାଉଛି। ସେହି କ୍ରମରେ ଓଡ଼ିଶା ସରକାରଙ୍କ ପକ୍ଷରୁ ମଧ୍ୟ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରାଯାଉଥିବା ବାଚସ୍ପତି କହିଥିଲେ। ସ୍ବାସ୍ଥ୍ୟମନ୍ତ୍ରୀ ନବ କିଶୋର ଦାସ କହିଥିଲେ ଯେ, ଅଦ୍ୟାବଧି ରାଜ୍ୟରେ କୌଣସି ସଂକ୍ରମଣ ଦେଖାଦେଇନାହିଁ। ରାଜ୍ୟ ସରକାର ଏହାର ପ୍ରତିରୋଧ ପାଇଁ ସମସ୍ତ ପଦକ୍ଷେପ ଗ୍ରହଣ କରିଥିବା ନବ କହିଥିଲେ। ସେହିଭଳି ସଭାରେ ଉପସ୍ଥିତ ଥିବା ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ କହିଥିଲେ ଯେ, ସଂକ୍ରମିତଙ୍କ ସଂଖ୍ୟା ଗୁଣୋତ୍ତର ପ୍ରଗତିରେ ବୃଦ୍ଧି ଘଟୁଛି। ଏହି ସଂକ୍ରମଣର କୌଣସି ଔଷଧ ନ ଥିବାରୁ କେବଳ ସତର୍କତା ଅବଲମ୍ବନ ହିଁ ଏକମାତ୍ର ଉପାୟ ବୋଲି ତ୍ରିପାଠୀ କହିଥିଲେ। ସ୍ବାସ୍ଥ୍ୟ ବିଭାଗ ପ୍ରମୁଖ ଶାସନ ସଚିବ ନିକୁଞ୍ଜ କିଶୋର ଧଳ କରୋନା ଭୂତାଣୁ ସମ୍ପର୍କିତ ଏକ ପାୱାରପଏଣ୍ଟ ଉପସ୍ଥାପନ କରିଥିଲେ। ନିକୁଞ୍ଜ କହିଥିଲେ ଯେ, ସାରା ପୃଥିବୀର ୧୨୦ ଦେଶ ଏ ଭୂତାଣୁ ଦ୍ୱାରା ସଂକ୍ରମିତ ହୋଇଛି। ସମସ୍ତଙ୍କ ମିଳିତ ପ୍ରଚେଷ୍ଟା ଓ ପ୍ରତିଷେଧମୂଳକ ପଦକ୍ଷେପ ଦ୍ୱାରା ଏହି ସଂକ୍ରମଣକୁ ପ୍ରତିହତ କରାଯାଇପାରିବ ବୋଲି ଧଳ କହିଥିଲେ।