ରେମୁଣା, ୨୬।୭(ଡି.ଏନ.ଏ.)-ବାଲେଶ୍ୱର ଜିଲା ରେମୁଣା ବ୍ଲକ ପତ୍ରିପାଳ ପଞ୍ଚାୟତ ହାତିଆଗଣ୍ଡ ଅଙ୍ଗନୱାଡ଼ି କେନ୍ଦ୍ରରେ ବର୍ଷେ ହେବ ତାଲା ଝୁଲୁଛି। କୋମଳମତି ଶିଶୁଙ୍କୁ ବାରଣ୍ଡାରେ ପାଠପଢା ଯାଉଥିଲେ ମଧ୍ୟ ଏଥିପ୍ରତି ପ୍ରଶାସନ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନାହଁି। ସରକାରଙ୍କ ଆମ ଅଙ୍ଗନୱାଡ଼ି ଯୋଜନା ଏଠି ଫେଲ୍ ମାରିଛି। ବାରଣ୍ଡାରେ କୋମଳମତି ଶିଶୁଙ୍କ ଭବିଷ୍ୟତ ନେଇ ଅଭିଭାବକ ମହଲରେ ଅସନ୍ତୋଷ ଦେଖାଦେଇଛି।
୨୦ରୁ ଊର୍ଦ୍ଧ୍ୱ ପିଲା ଏହି କେନ୍ଦ୍ରରେ ଅଧ୍ୟୟନ କରନ୍ତି। କେନ୍ଦ୍ରରେ ତାଲା ପଡିଥିବାରୁ ଏବେ ଅଧାରୁ କମ୍ ପିଲା ପଢ଼ିବାକୁ ଆସୁଛନ୍ତି ବୋଲି ପତ୍ରିପାଳ ସେଣ୍ଟର ସୁପରଭାଇଜର ଚମ୍ପାରାଣୀ ମହାନ୍ତି କହିଛନ୍ତି। ପୁଷ୍ଟିସାର ଅଭାବ ପୂରଣ ପାଇଁ ସପ୍ତାହରେ ଦୁଇଦିନ ପିଲାଙ୍କୁ ଅଣ୍ଡା ପ୍ରଦାନ କରାଯିବା କଥା। ହେଲେ ସେମାନେ ଅଣ୍ଡା ପାଉନାହାନ୍ତି କି ଅନ୍ୟ ଖାଦ୍ୟ ମଧ୍ୟ ପାଉ ନ ଥିବା ଅଙ୍ଗନୱାଡ଼ି କର୍ମୀ ରୀତାଞ୍ଜଳି ଦାସ କହିଛନ୍ତି। କେନ୍ଦ୍ରରେ ତାଲା ଝୁଲୁଥିବା, ଦରମା ମିଳୁ ନ ଥିବା, ପିଲାଙ୍କୁ ଖାଦ୍ୟ ମିଳୁ ନ ଥିବା ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଲିଖିତ ଭାବେ ଜଣାଇବା ପରେ ବି କୌଣସି ପଦକ୍ଷେପ ନିଆଯାଉ ନ ଥିବା ସେ କହିଛନ୍ତି। ଭାରପ୍ରାପ୍ତ ସିଡିପିଓ ସବିତା ରାଉତ କହିଛନ୍ତି ଯେ, ସହାୟିକା ନିଯୁକ୍ତି ନେଇ କେନ୍ଦ୍ରରେ ତାଲା ପକାଯାଇଛି। ପୂର୍ବତନ ସିଡ଼ିପିଓଙ୍କ ସମୟରେ ସେଠାରେ ସହାୟିକା ଭାବେ ଅନସୂୟା ଦାସଙ୍କୁ ନିଯୁକ୍ତି ଦିଆଯାଇଥିଲା। ଏହାକୁ କିଛି ଲୋକ ବିରୋଧ କରି କେନ୍ଦ୍ରରେ ତାଲା ପକାଇଥିଲେ।