କେନ୍ଦୁଝର/ଯୋଡ଼ା,୫ା୫ (ସ୍ବ.ପ୍ର./ଡି.ଏନ୍.ଏ.)-କେନ୍ଦୁଝର ବନ ବିଭାଗ ବାମେବାରୀ ଥାନା ଅନ୍ତର୍ଗତ କେନ୍ଦୁଘାଟି ଜଙ୍ଗଲରୁ ଏକ ହାତୀର ଗଳିତ ମୃତଦେହ ଉଦ୍ଧାର କରିଛି। ହାତୀର ବୟସ ଠିକ୍ ଜଣାପଡି ନ ଥିଲେ ହେଁ ୩୦ ବର୍ଷରୁ ଅଧିକ ହେବ। ମାସେ ପୂର୍ବରୁ ହାତୀଟିର ମୃତ୍ୟୁ ହୋଇଥିବା ସ୍ଥାନୀୟ ଲୋକେ ଅନୁମାନ କରୁଛନ୍ତି। ହେଲେ ବନ ବିଭାଗ କିପରି ଜାଣି ପାରିଲା ନାହିଁ ତାହାକୁ ନେଇ ସନ୍ଦେହ ସୃଷ୍ଟି ହେଉଛି।
ମଙ୍ଗଳବାର ସକାଳେ କୌଣସି ସୂତ୍ରରୁ ଖବରପାଇ ଡିଏଫ୍ଓ ସନ୍ତୋଷ ଯୋଶୀ ଓ ଏସିଏଫ ଅଜୟ କୁମାର ସାହୁ , ବାମେବାରୀ ବନପାଳ ଜତିନ୍ଦ୍ର କୁମାର ସାହୁ ତଥା ଅନ୍ୟ କର୍ମଚାରୀ ଘଟଣାସ୍ଥଳକୁ ଯାଇଥିଲେ। ସେଠାରେ ହାତୀର ହାଡ଼ ଓ ଚମଡା ଥିବା ଅବଶେଷକୁ ସଂଗ୍ରହ କରି ଡିଏନ୍ଏ ଟେଷ୍ଟ ପାଇଁ ଡେରାଡୁନସ୍ଥିତ ଭାରତୀୟ ବନ୍ୟପ୍ରାଣୀ ସଂସ୍ଥାନକୁ ପଠାଯାଇଛି। ରିପୋର୍ଟ ଆସିବା ପରେ ହାତୀର ଲିଙ୍ଗ ଓ ବୟସ ଜଣାପଡିବ ବୋଲି ଏସିଏଫ ସାହୁ କହିଛନ୍ତି। ବ୍ୟବଚ୍ଛେଦ ପରେ ଗଳିତ ମୃତଦେହ ମାଟିରେ ପୋତି ଦିଆଯାଇଛି। ମୃତ୍ୟୁର କାରଣ ଜଣାପଡୁ ନ ଥିଲେ ହେଁ ହାତୀ ମଳରେ ପ୍ଲାଷ୍ଟିକ ଜରି ବାହାରିଥିବା ବ୍ୟବଚ୍ଛେଦ କରିଥିବା ସହକାରୀ ପ୍ରାଣୀ ଚିକିତ୍ସକ ସୁକାନ୍ତ ଶିଅଳ କହିଛନ୍ତି। ହାତୀଟି ଖାଦ୍ୟାଭାବ କିମ୍ବା ପ୍ଲାଷ୍ଟିକ ଖାଇବା କାରଣରୁ ମୃତ୍ୟୁବରଣ କରିଥିବା ସନ୍ଦେହ କରାଯାଉଛି। ମୃତ ହାତୀର ଦାନ୍ତ ନ ଥିବାରୁ ଚୋରି ହୋଇଛି କି ଏହା ମାଈ ହାତୀ ତାହା ଜଣାପଡୁ ନାହିଁ। ଡିଏନ୍ଏ ରିପୋର୍ଟ ମିଳିବା ପରେ ହାତୀମୃତ୍ୟୁର ପ୍ରକୃତ କାରଣ ଜଣାପଡିବ ବୋଲି ମତ ପ୍ରକାଶ ପାଉଛି।