ବନ୍ତଳା, ୩୧।୧୨(ଡି.ଏନ.ଏ): ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ପୁରୁଣା କୋଟ ଥାନା ରେଞ୍ଜ ଅଧୀନରେ ଥିବା ଗୋପାଳପୁର ଗ୍ରାମରେ ମଙ୍ଗଳବାର ଏକ ଅଭାବନୀୟ ଘଟଣା ଘଟିଛି। ଭୋର ୩.୧୫ ମିନିଟରେ ହାତୀ ଆକ୍ରମଣରେ ଗ୍ରାମର ଜଣେ ମହିଳା ଜୟନ୍ତୀ ବିର (୪୨)ଙ୍କର ମୃତ୍ୟୁ ହୋଇଛି। ଖବର ପାଇ ତୁରନ୍ତ ରେଞ୍ଜର ଗଜେନ୍ଦ୍ର ବେହେରା ଓ ବନ କର୍ମଚାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ଥାନା ଅଧିକାରୀ ବିକ୍ରମ ବିହାରୀ ଜୟପୁରିଆ ପହଞ୍ଚି ଏକ ଅପମୃତ୍ୟୁ ମାମଲା ରୁଜୁ କରିବା ସହ ମୃତଦେହ ଜବତ କରି ତଦନ୍ତ ଆରମ୍ଭ କରିଛନ୍ତି। ସୂଚନାଯୋଗ୍ୟ, ଜୟନ୍ତୀ ଘରେ ଶୋଇଥିଲେ। ତେବେ ଭୋର ସମୟରେ କୁକୁର ଦଳ ଭୁକିବାରୁ ଷଣ୍ଢ ଆସିଥିବା ଭାବି ଘର ଭିତରୁ ବାହାରି ଷଣ୍ଢକୁ ଘଉଡାଇବା ପାଇଁ ଯାଉଥିଲେ। ସେହି ସମୟରେ ହାତୀ ଜୟନ୍ତୀକୁ ଟାଣି ନେଇ ମାରିଦେଇଥିଲା।