ସଜନାଗଡ଼, ୨୯।୮(ଡି.ଏନ.ଏ.)-ବାଲେଶ୍ୱର ଜିଲା ନୀଳଗିରି ଉପଖଣ୍ଡରେ ଥିବା କୁଲଡ଼ିହା ଅଭୟାରଣ୍ୟରେ ହାତୀଙ୍କ ଉପତ୍ାତ ଦିନକୁ ଦିନ ବଢ଼ି ଚାଲିଛି। କେତେବେଳେ ଚାଷଜମିର କ୍ଷତି କରୁଛନ୍ତି ତ, କେତେବେଳେ ବାଡ଼ି ଘରେ ପଶି କଦଳୀ ଗଛ, ବାଉଁଶବୁଦାରେ ଖାଇବା ସହ ଅନ୍ଧାର ରାତିର ସୁଯୋଗ ନେଇ ଘର ଭାଙ୍ଗୁଛନ୍ତି।
ସଜନାଗଡ଼ ପଞ୍ଚାୟତ ବାଣ୍ଠିଆପଡ଼ା ଗ୍ରାମର ଖୁଦିରାମ ସିଂ(୨୨) ଗୁରୁବାର ପୂର୍ବାହ୍ନରେ ଛେଳି ଚରାଇବା ପାଇଁ କୁଲଡ଼ିହା ପାଦଦେଶର ହୁଡ଼ିସାହି ଅଞ୍ଚଳକୁ ଯାଇଥିଲେ। ସେ ମଧ୍ୟାହ୍ନ ୧୨ଟା ବେଳେ ଫେରୁଥିବା ବେଳେ ଏକ ଦନ୍ତାହାତୀ ସହ ମୁହାଁମୁହଁି ହୋଇଥିଲେ। ହାତୀଦାଉରୁ ବଞ୍ଚତ୍ବା ପାଇଁ ଜୀବନ ବିକଳରେ ସେ ଦୌଡ଼ି ଆସୁଥିବା ବେଳେ ଏକ ଖାଲରେ ପଡ଼ିଯାଇଥିଲେ। ଖାଲରେ ଥିବା ଏକ ବଡ଼ ଖୁଞ୍ଚା ତାଙ୍କ ପେଟରେ ପଶି ଯାଇଥିଲା। ଖାଲରେ ଖୁଦିରାମ ପଡ଼ିଯିବାର ଦେଖି ହାତୀଟି ଫେରିଯାଇଥିଲା। ପରେ ତାଙ୍କ ଚିତ୍କାର ଶୁଣି ପାଖ ଗ୍ରାମବାସୀ ପରିବାର ପାଖରେ ପହଞ୍ଚାଇଥିବା ବେଳେ ପରିବାର ଲୋକ ପ୍ରଥମେ ନୀଳଗିରି ମେଡ଼ିକାଲକୁ ଆଣିଥିଲେ। ଡାକ୍ତର ପ୍ରାଥମିକ ଚିକିତ୍ସା କରାଇବା ପରେ ପରିସ୍ଥିତି ଜଟିଳ ହେବାରୁ ତାଙ୍କୁ ବାଲେଶ୍ୱର ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଥିଲା। ସେ ଏବେ ଜିଲା ମୁଖ୍ୟ ଚିକିତ୍ସାଳୟରେ ଚିକିତ୍ସାରତ ଅଛନ୍ତି।