ମାଧପୁର/ବଇଣ୍ଡା, ୧୨ା୯(ଡି.ଏନ.ଏ.)- ଅନୁଗୋଳ ଜିଲା ଆଠମଲ୍ଲିକ ବ୍ଲକ ମୁଚ୍ଛପୁର ଗ୍ରାମରେ ହାତୀପଲ ପଶି ବ୍ୟାପକ କ୍ଷୟକ୍ଷତି କରିଛନ୍ତି। ବିଲରେ ପଶି ଚାଷୀମାନଙ୍କ ଧାନ ଫସଲ ଉଜାଡିବା ଦେଇଥିବାରୁ ସେମାନେ ଚିନ୍ତାରେ ପଡିଛନ୍ତି। ଗ୍ରାମର ସନ୍ତୋଷ କର୍ଣ୍ଣ, ହୃଦାନନ୍ଦ କର୍ଣ୍ଣ, ରଞ୍ଜନ କର୍ଣ୍ଣ, ଶ୍ରୀପତି କର୍ଣ୍ଣ ପ୍ରମୁଙ୍କ ଚାଷ ଜମିରେ ହାତୀ ଦଳି ଚକଟି ଫସଲ ନଷ୍ଟ କରିଥିବା ସେମାନେ ପ୍ରକାଶ କରିଛନ୍ତି। କିଛି ଦିନ ହେଲା ଏହି ଅଞ୍ଚଳରେ ହାତୀ ଉତ୍ପାତ ବଢିବାରେ ଲାଗିଛି। ସା ହେବାକ୍ଷଣି ଲୋକେ ଘରୁ ବାହାରିବା ପାଇଁ ଲୋକେ ଭୟ କରୁଛନ୍ତି। ଏ ସମ୍ପର୍କରେ ମାଧପୁର ରେଞ୍ଜର ସନ୍ତୋଷ କୁମାର ଭୋଇ କହିଛନ୍ତି, ହାତୀ ଉପଦ୍ରବ ବାବଦରେ ଖବର ଅଛି। ଏହି ଅଞ୍ଚଳରେ ଏକ ମାଖନା ହାତୀ ଆଗରୁ ଥିଲା। ଏବେ ରେଢ଼ାଖୋଲ ଅଞ୍ଚଳରୁ ଏକ ଦନ୍ତା ହାତୀ ଆସି ତା ସହ ମିଶିଥିବାରୁ ଏପରି ସ୍ଥିତି ଉପୁଜିଛି। କ୍ଷତିଗ୍ରସ୍ତଙ୍କୁ କ୍ଷତିପୂରଣ ପ୍ରଦାନ କରାଯିବା ବନ୍ଦୋବସ୍ତ କରାଯାଉଛି ବୋଲି ସେ କହିଛନ୍ତି। ସେହିପରି କିଶୋରନଗର ବ୍ଲକ ହଣ୍ଡପା ରେଞ୍ଜ ମଧପୁର, କଣ୍ଟେଇକୁଳିଆ, ଅଁଳାବେରେଣୀ, ନାଗାଝରଣ ଆଦି ଗ୍ରାମଗୁଡିକରେ ହାତୀ ଉପଦ୍ରବ ଲାଗି ରହିଛି। ହାତୀପଲ ଗ୍ରାମାଭିମୁଖି ହୋଇ ବ୍ୟାପକ ପନିପରିବା ଚାଷ ସହ କଦଳୀ, ଆମ୍ବଗଛ ଭାଙ୍ଗି ନଷ୍ଟ କରୁଛନ୍ତି। ତୁରନ୍ତ ଏଥିପ୍ରତି ଦୃଷ୍ଟି ଦେଇ କ୍ଷତିଗ୍ରସ୍ତଙ୍କୁ କ୍ଷତିପୂରଣ ପ୍ରଦାନ କରାଯିବାକୁ ଦାବି ହୋଇଛି।