ଭୁବନେଶ୍ୱର, ୧୬।୧୦(ବ୍ୟୁରୋ):ଫସଲ ଖାଇବାକୁ ଆସୁଥିବା ହାତୀଙ୍କୁ ଘଉଡ଼ାଇବା ପାଇଁ ଲୋକେ ନିଆଁ ହୁଳା ଦେଖାଇବା ସହ ରକେଟ୍ ବାଣ ବ୍ୟବହାର କରୁଛନ୍ତି। ଅନୁଗୋଳ ବନଖଣ୍ଡ ତାଳଚେର ବନାଞ୍ଚଳର ବିଭିନ୍ନ ଅଞ୍ଚଳରେ ଏଭଳି ପରିସ୍ଥିତି ଦେଖିବାକୁ ମିଳୁଛି। ତେବେ ରକେଟ ବାଣ ହିଁ ହାତୀଙ୍କ ପାଇଁ ଏବେ ବିପଦ ସାଜିଛି। ଏହା ମଧ୍ୟ ବେଆଇନ ଅଟେ। ବନ୍ୟପ୍ରାଣୀ(ସଂରକ୍ଷଣ) ଆଇନ ୧୯୭୨ ଅନୁଯାୟୀ ନିଷ୍ଠୁର ଓ କ୍ଷତିକାରକ ଭାବେ ହାତୀ ଘଉଡ଼ାଇବା ଅପରାଧ ଅଟେ। ଏଭଳି ନ କରିବା ପାଇଁ ସୁପ୍ରିମକୋର୍ଟ ମଧ୍ୟ ୨୦୧୮ ଅଗଷ୍ଟ ୧ରେ ନିର୍ଦ୍ଦେଶନାମା ଜାରି କରିଛନ୍ତି। ତେଣୁ ଯଥାଶଘ୍ର ଏ ଦିଗରେ ପଦକ୍ଷେପ ଗ୍ରହଣ କରିବା ପାଇଁ ଓ୍ବାଇଲ୍ଡଲାଇଫ୍ ସୋସାଇଟି ଅଫ୍ ଓଡ଼ିଶା(ଡବ୍ଲ୍ୟୁଏସ୍ଓ) ଦାବି କରିଛି। ଏ ନେଇ ଡବ୍ଲ୍ୟୁଏସ୍ଓ ପକ୍ଷରୁ ପିସିସିଏଫ୍(ବନ୍ୟପ୍ରାଣୀ)ଙ୍କୁ ଚିଠି ଲେଖାଯାଇଛି।
ଏ ସମ୍ପର୍କରେ ଡବ୍ଲ୍ୟୁଏସ୍ଓ ଅଧ୍ୟକ୍ଷ ବିଶ୍ୱଜିତ ମହାନ୍ତି କୁହନ୍ତି, ଗତବର୍ଷ ତାଳଚେର ବନାଞ୍ଚଳରେ ଏଭଳି ଘଟଣା ଦେଖିବାକୁ ମିଳିଥିଲା। ଏ ସମ୍ପର୍କରେ ଅଭିଯୋଗ ପରେ ଅନୁଗୋଳ ଡିଭିଜନ୍ରେ ଏଭଳି କାର୍ଯ୍ୟକୁ ବନ୍ଦ କରିବା ପାଇଁ ଅନୁଗୋଳ ବନଖଣ୍ଡ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଥିଲା। ତେବେ କିଛିଦିନର ବନ୍ଦ ପରେ ଏବେ ପୁଣି ସମାନ ପରିସ୍ଥିତି ଦେଖାଯାଇଛି। ଗତ ୭/୮ଦିନ ହେବ ତାଳଚେର ବନାଞ୍ଚଳ ଅଧୀନ ସନ୍ଥପଡ଼ା ଓ ଦାସନଳୀ ଜାଗାରେ ହାତୀଙ୍କୁ ଘଉଡ଼ାଇବା ପାଇଁ ଲୋକେ ରକେଟ୍ ବାଣ ଫୁଟାଉଛନ୍ତି। ରକେଟ ପକାଇଲେ ହାତୀ ପ୍ରତି ବିପଦ ରହିଛି। ସେମାନେ ଭୟଭୀତ ହୋଇ ଏଣେତେଣେ ବୁଲୁଛନ୍ତି। ତେଶୁ ହାତୀ ବିଲରେ ଫସଲ ଖାଇବାବେଳେ ବାଜା କିମ୍ବା ଅନ୍ୟାନ୍ୟ ବାଦ୍ୟ ଯନ୍ତ୍ର ବଜାଇ ଓ ଲାଇଟ୍ ପକାଇ ଘଉଡ଼ାଇବା ଉଚିତ ବୋଲି ବିଶ୍ୱଜିତ କହିଛନ୍ତି।
