ପୁଣି ଏକ ନୂଆ ବାଉନ୍ସର ଛାଡିଛନ୍ତି ଭାରତୀୟ କ୍ରିକେଟ ଦଳର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା। ନୂଆବର୍ଷର ଠିକ ପୂର୍ବଦିନ ଅଚାନକ ନିଜ ନିର୍ବନ୍ଧ ଖବର ଦେଇ ପ୍ରଶଂସକଙ୍କୁ ଚକିତ କରି ଦେଇଥିବା ହାର୍ଦ୍ଦିକ ଖୁବ୍ ଶୀଘ୍ର ପିତା ହେବା ଖବର ନିଜ ଫ୍ୟାନ୍ଙ୍କୁ ଦେଇଛନ୍ତି। ଏହି ଖବର ଆସିବା ପରେ ତାଙ୍କୁ ବହୁ କ୍ରିକେଟର ଶୁଭେଚ୍ଛା ଜଣାଇଛନ୍ତି। ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି କହିଛନ୍ତି, ଉଭୟଙ୍କୁ ଅଭିନନ୍ଦନ; ନୂଆ ମେମ୍ବରଙ୍କୁ ଅନେକ ଭଲପାଇବା ଏବଂ ଆଶୀର୍ବାଦ। ସେପରି କୋଚ ରବି ଶାସ୍ତ୍ରୀ, ବୋଲର ୟୁଜବେନ୍ଦ୍ର ଚହଲ, ଶୁଭମନ ଗିଲ୍, ଶିଖର ଧାଓ୍ବନ, କିରଣ ପୋଲାର୍ଡ ପ୍ରମୁଖ ତାଙ୍କୁ ଶୁଭେଚ୍ଛା ଜଣାଇଛନ୍ତି। ରବିବାର ଗର୍ଲଫ୍ରେଣ୍ଡ ନତାଶା ଷ୍ଟାଙ୍କୋଭିକ୍ଙ୍କ ପେଟ ଉପରେ ପାଣ୍ଡ୍ୟା ହାତ ରଖିଥିବା ଫଟୋ ଶେୟାର କରିଥିଲେ। ‘ନତାଶା ଓ ମୋର ଜୀବନ ଯାତ୍ରା ବହୁତ ସୁଖଦ ରହିଛି। ଏହା ଆହୁରି ରୋଚକ ହେବାକୁ ଯାଉଛି। ଆମେ ଦୁଇ ଜଣ ଆମ ଜୀବନକୁ ଖୁବଶୀଘ୍ର ଜଣେ ନୂଆ ଆଗନ୍ତୁକଙ୍କୁ ସ୍ବାଗତ କରିବାକୁ ଯାଉଛୁ। ଜୀବନର ଏହି ପର୍ଯ୍ୟାୟକୁ ନେଇ ଆମେ ବହୁତ ରୋମାଞ୍ଚିତ ଅଛୁ। ଆପଣଙ୍କ ଆଶୀର୍ବାଦ ଓ ଶୁଭେଚ୍ଛା କାମନା କରୁଛୁ ବୋଲି’ ପାଣ୍ଡ୍ୟା ଏହି ଫଟୋ କ୍ୟାପ୍ସନ୍ରେ ଲେଖିଛନ୍ତି।
