ନୂଆଦିଲ୍ଲୀ: ପ୍ରତିବର୍ଷ ଜୁନ୍ ୨୦କୁ ବିଶ୍ୱ ଶରଣାର୍ଥୀ ଦିବସ ଭାବେ ପାଳନ କରାଯାଇଥାଏ। ବିଶ୍ୱରେ ଶରଣାର୍ଥୀମାନଙ୍କ ସ୍ଥିତି ସମ୍ପର୍କରେ ସଚେତନ କରାଇବା ଲାଗି ଏହି ଦିବସ ପାଳନ କରାଯାଇଥାଏ। ଡିସେମ୍ବର ୪, ୨୦୦୦ରେ ଜାତିସଂଘ ସାଧାରଣ ପରିଷଦରେ ଜୁନ୍ ୨୦କୁ ବିଶ୍ୱ ଶରଣାର୍ଥୀ ଦିବସ ଭାବେ ପାଳନ କରାଯିବା ଲାଗି ପ୍ରସ୍ତାବ ପାରିତ କରାଯାଇଥିଲା। ଦ୍ୱନ୍ଦ୍ୱ, ହିଂସା, ଯୁଦ୍ଧ ଓ ବିଭିନ୍ନ ବିପତ୍ତି ସମୟରେ ଏହି ଶରଣାର୍ଥୀମାନେ ନାନା ସମସ୍ୟାର ସମ୍ମୁଖୀନ ହୋଇଥାନ୍ତି। ଯୁଦ୍ଧ ଯୋଗୁ କେଉଁଠି ସେମାନଙ୍କୁ ତଡ଼ି ଦିଆଯାଉଛି ତ ଆଉ କେଉଁଠି ଜୀବନ ବଞ୍ଚାଇବା ଲାଗି ସଂଘର୍ଷ କରୁଛନ୍ତି। କରୋନା କାଳରେ ବହୁ ଲୋକ ବାହାର ରାଜ୍ୟରେ ଫସିରହି ନାନାଦି ସମସ୍ୟା ଭୋଗିଥିବାବେଳେ ଅନେକେ ଶହ ଶହ କି.ମି. ଚାଲି ଶରଣାର୍ଥୀ ଶିବିରରେ କାଳ କାଟିଥିଲେ। ସେମାନଙ୍କ ଦୁର୍ବିଷହ ଜୀବନ ଜୀବିକା କଥା ନିଜେ ନ ଦେଖିଲେ ବିଶ୍ୱାସ ହେବନି।
ବିଶ୍ୱର ଶହେରୁ ଊର୍ଦ୍ଧ୍ୱ ଦେଶ ଶରଣାର୍ଥୀ ଦିବସକୁ ପାଳନ କରିଆସୁଛନ୍ତି। ମିଳିମିଶି ଶରଣାର୍ଥୀଙ୍କ ସମସ୍ୟାର ସମାଧାନ କରିବା, ସେମାନଙ୍କୁ ନିଜ ଘରକୁ ସୁରକ୍ଷିତ ଭାବେ ପଠାଇବା, ସେମାନଙ୍କ ଜୀବନଶୈଳୀରେ ପରିବର୍ତ୍ତନ ଆଣିବା, ହିଂସା ଓ ଭୟଠାରୁ ସେମାନଙ୍କୁ ଦୂରେଇ ରଖିବା ଲାଗି ବିଭିନ୍ନ କାର୍ଯ୍ୟ କରାଯାଉଛି। ଏବେ ବିଶ୍ୱରେ ପାଖାପାଖି ୭ କୋଟି ଲୋକ ଶରଣାର୍ଥୀ ଭାବେ ରହିଆସୁଛନ୍ତି। ଏବେ ବିଶ୍ୱର ସର୍ବାଧିକ ଶରଣାର୍ଥୀ କ୍ୟାମ୍ପ କେନିଆର ଦାଦାବ୍ରେ ରହିଛି। ପ୍ରାୟ ୩.୩ ଲକ୍ଷ ଶରଣାର୍ଥୀ ସେଠାରେ ରହୁଛନ୍ତି। ବିଶ୍ୱରେ ଥିବା ମୋଟ ଶରଣାର୍ଥୀଙ୍କ ମଧ୍ୟରୁ ଅର୍ଦ୍ଧାଧିକ ୧୮ ବର୍ଷରୁ କମ୍ ବୋଲି ଜଣାପଡ଼ିଛି। ବିଶ୍ୱଯୁଦ୍ଧ କିମ୍ବା ସିରିଆ ଯୁଦ୍ଧ ପରେ ଶରଣାଥର୍ର୍ୀଙ୍କ ସଂଖ୍ୟା ବୃଦ୍ଧିପାଇଛି। ବିଭିନ୍ନ ସୋସିଆଲ ମିଡିଆରେ ସେମାନଙ୍କ ଦୁଃଖ ଓ ସମସ୍ୟା ସମ୍ପର୍କରେ ତଥ୍ୟ ଲୋକଲୋଚନକୁ ଆଣିବା, ସହାନୁଭୂତି, ସୁରକ୍ଷା ସହ ସେମାନଙ୍କୁ ସାମାଜିକ ମୁଖ୍ୟ ସ୍ରୋତରେ ସାମିଲ କରିବା ନିହାତି ଆବଶ୍ୟକ। ଶରଣାର୍ଥୀମାନେ ଆମ ଭଳି ମଣିଷ। ସେମାନଙ୍କର ସୁଖ ଶାନ୍ତିରେ ରହିବାର ଅଧିକାର ଅଛି। ଅନ୍ୟ ଦେଶରେ ରହି ମଧ୍ୟ ସେମାନେ ନିର୍ଭୟର ସହ ବଞ୍ଚିବାର ଅଧିକାର ରହିଛି। ଏଥିରେ ଦ୍ୱିମତ ନାହିଁ।