ନୂଆଦିଲ୍ଲୀ,୨୮।୨: ଗତ କିଛି ଦିନରୁ ଦିଲ୍ଲୀର ଉତ୍ତର-ପୂର୍ବ ଅଞ୍ଚଳରେ ହୋଇଥିବା ହିଂସାକାଣ୍ଡ ପରେ ଶୁକ୍ରବାର ପ୍ରଥମ ପ୍ରାର୍ଥନା ଅନୁଷ୍ଠିତ ହେବ। ସେହି ସମୟରେ ଆଇନ୍ ବ୍ୟବସ୍ଥାକୁ ସମ୍ଭାଳିବା ପୋଲିସ ପାଇଁ କୌଣସି ପରୀକ୍ଷାଠାରୁ କମ୍ ନୁହେଁ। ଏଥିସହ ଦିଲ୍ଲୀ ପୋଲିସ ପାଇଁ ଆଉ ଏକ ବଡ଼ ଚ୍ୟାଲେଞ୍ଜିଂ ରହିବ ଜାମିଆରେ ଶୋଭାଯାତ୍ରା। କାରଣ ଗତ କିଛି ଦିନରୁ ଦେଶର ରାଜଧାନୀ ଅଶାନ୍ତ ଥିବା ବେଳେ କିଛି ଅଞ୍ଚଳରେ ହିଂସାକାଣ୍ଡ ଦେଖାଦେଇଥିଲା। ଏଥିରେ ପୋଲିସର କାର୍ଯ୍ୟଶୈଳୀ ଉପରେ ସୁପ୍ରିମକୋର୍ଟ ପ୍ରଶ୍ନ ଉଠାଇଥିଲେ ଏବଂ ବ୍ରିଟେନ ଓ ଆମେରିକାର ପୋଲିସ ଭଳି କାମ କରିବାକୁ ପରାମର୍ଶ ଦେଇଥିଲେ। ସୂଚନାଯୋଗ୍ୟ, ଉତ୍ତେଜନାପୂର୍ଣ୍ଣ ମାହୋଲରେ ମସ୍ଜିଦ୍ରେ ଶୁକ୍ରବାର ପ୍ରାର୍ଥନା ଅନୁଷ୍ଠିତ ହେବ। ସେହି ସମୟରେ କୌଣସି ଅପ୍ରିତିକର ପରିସ୍ଥିତି ନ ଉପୁଜିବା ପାଇଁ ପୋଲିସ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡ଼ାକଡି କରାଯାଇଛି। ଅପରପକ୍ଷରେ ଶୁକ୍ରବାର ପ୍ରାର୍ଥନା ପରେ ଜାମିଆରେ ଏକ ଶୋଭାଯାତ୍ରା ବାହାର କରାଯିବ ବୋଲି ପୂର୍ବରୁ ଆହ୍ବାନ ଦିଆଯାଇଥିଲା। ଏହି ଶୋଭାଯାତ୍ରା ଜାମା ମସ୍ଜିଦ୍ରୁ ସେଣ୍ଟ୍ରାଲ୍ କ୍ୟାଣ୍ଟିନ୍ ପର୍ଯ୍ୟନ୍ତ ବାହାରିବ। ତେବେ ଏଥିରେ କୌଣସି ଅଘଟଣ ନ ଘଟିବା ସହ ଶାନ୍ତିପୂର୍ଣ୍ଣ ଶୋଭାଯାତ୍ରା ହେବ ସେନେଇ ପୋଲିସ ଉଦ୍ୟମ ଚଳାଇଛି।