କୋଲକାତା,୧୧ା୬: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ରାଜ୍ୟରେ ହିଂସାକାଣ୍ଡ ଲାଗି ଭାଜପାକୁ ଦୋଷ ଦେଇଛନ୍ତି। କେନ୍ଦ୍ର ଓ ଭାଜପା କର୍ମୀମାନେ ମୁଖ୍ୟତଃ ଏଥିଲାଗି ଦାୟୀ। ରାଜ୍ୟ ସରକାରଙ୍କୁ ଗାଦିଚ୍ୟୁତ କରିବା ଲାଗି ଭାଜପା ଷଡ଼ଯନ୍ତ୍ର କରୁଛି। ବିଭିନ୍ନ ସୋସିଆଲ ନେଟ୍ଓ୍ବର୍କିଂ ଓ୍ବେବ୍ସାଇଟ୍ ଜରିଆରେ ଭାଜପା ମିଛ କଥା ଛାପି କୋଟିକୋଟି ଟଙ୍କା ଖର୍ଚ୍ଚକରିବା ସହ ପଶ୍ଚିମବଙ୍ଗରେ ହିଂସା ସୃଷ୍ଟି କରିବାକୁ ଚେଷ୍ଟା କରୁଛି। ଦଙ୍ଗା ହେଲେ ରାଜ୍ୟ ସହ କେନ୍ଦ୍ର ସରକାର ମଧ୍ୟ ସମାନଭାବେ ଦାୟୀ ରହିବେ ବୋଲି ମମତା ସଚିବାଳୟଠାରେ ଖବରଦାତାଙ୍କୁ କହିଛନ୍ତି। ସେମାନେ ମୋ କଣ୍ଠରୋଧ କରିବାକୁ ଚାହୁଛନ୍ତି। ହେଲେ କେବେହେଲେ ଗେମ୍ପ୍ଲାନ୍ରେ ସେମାନେ ସଫଳ ହେବେ ନାହିଁ ବୋଲି ମମତା ପ୍ରକାଶ କରିଛନ୍ତି। କେନ୍ଦ୍ରରୁ ଦିଆଯାଇଥିବା ନିର୍ଦ୍ଦେଶାବଳୀକୁ ନେଇ ସେ କହିଛନ୍ତି ଯେ, ରାଜ୍ୟ ମୁଖ୍ୟ ଶାସନ ସଚିବ ମଳୟ କୁମାର ଦେ ଏନେଇ ମନ୍ତବ୍ୟ ଦେଇସାରିଛନ୍ତି। ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ନିୟନ୍ତ୍ରଣାଧୀନ ରହିଛି। ହିଂସାକାଣ୍ଡ ମାମଲା ସାମ୍ନାକୁ ଆସିଲେ ତ୍ୱରିତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ଚିଠିରେ ଦର୍ଶାଯାଇଛି।
