ଲକ୍ଷ୍ନୌ,୧୮।୧୦: ଉତ୍ତରପ୍ରଦେଶ ରାଜଧାନୀ ଲକ୍ଷ୍ନୌରେ ହିନ୍ଦୁ ସମାଜ ପାର୍ଟିର ନେତା କମଲେଶ ତିଓ୍ବାରୀଙ୍କୁ ଶୁକ୍ରବାର ଦିନ ଦ୍ୱିପହରରେ ଗଳା କାଟି ହତ୍ୟା କରାଯାଇଛି। ଚିକିତ୍ସାଧିନ ଅବସ୍ଥାରେ ଟ୍ରମା ସେଣ୍ଟରରେ ତାଙ୍କର ମୃତ୍ୟୁ ହୋଇଥିବା ସୂଚନା ମିଳିଛି। ସୂଚନାଯୋଗ୍ୟ, ନାକାର ଖୁର୍ସିଦ ବାଗସ୍ଥିତ ହିନ୍ଦୁ ସମାଜ ପାର୍ଟି କାର୍ଯ୍ୟାଳୟକୁ ୨ଜଣ ଦୁର୍ବୃତ୍ତ କମଲେଶଙ୍କୁ ସାକ୍ଷାତ କରିବାକୁ ଆସିଥିଲେ। ସେଠାରେ କମଲେଶଙ୍କ ସହ ଚା’ ପିଇବା ପରେ ସାଙ୍ଗରେ ଆଣିଥିବା ଏକ ମିଠା ଡବାରୁ ଛୁରୀ କାଢ଼ି ତାଙ୍କ ଗଳାକୁ ଅତି ନିର୍ମମ ଭାବେ କାଟି ଦେଇଥିଲେ। ଏହାପରେ ତାଙ୍କୁ ଗୁଳି କରି ସେଠାରୁ ଦୁର୍ବୃତ୍ତମାନେ ଫେରାର ହୋଇଯାଇଥିଲେ। ଗୁରୁତର ଅବସ୍ଥାରେ ସଙ୍ଗେ ସଙ୍ଗେ ତାଙ୍କୁ ଟ୍ରମା ସେଣ୍ଟର ନିଆଯାଇଥିଲା। ହେଲେ ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଘଟଣାସ୍ଥଳରେ ପୋଲିସ ପହଞ୍ଚି ମାମଲା ରୁଜୁ କରିବା ସହ ହତ୍ୟାରେ ବ୍ୟବହୃତ ଛୁରୀ ଓ ବନ୍ଧୁକକୁ ଜବତ କରିଛି।
