କଳିଙ୍ଗନଗର,୪ା୧୨(ଡି.ଏନ୍.ଏ)- କଳିଙ୍ଗନଗର ଶିଳ୍ପାଞ୍ଚଳର ମେସ୍କୋ ଗ୍ରୁପ୍ର ମାଲିକାନାରେ ଥିବା ମୈଥାନ କାରଖାନା କର୍ମଚାରୀ ୧୧ ମାସ ହେବ ଦରମା ପାଇବାରୁ ବଞ୍ଚତ୍ତ ହୋଇଛନ୍ତି। ଏ ନେଇ ଦୀର୍ଘଦିନର ପଞ୍ଜୀଭୂତ ଅସନ୍ତୋଷ ମଙ୍ଗଳବାର ପ୍ରତିଫଳିତ ହୋଇଛି। ମେସ୍କୋ ଗ୍ରୁପ୍ ଅଧ୍ୟକ୍ଷା ରିତା ସିଂଙ୍କୁ ପ୍ରାୟ ୩ ଶହରୁ ଊର୍ଦ୍ଧ୍ୱ କର୍ମଚାରୀ ଗେଷ୍ଟ୍ ହାଉସ୍(ହିଲଭ୍ୟୁ ହୋଟେଲ)ରେ ନଜବରବନ୍ଦୀ କରି ରଖିଥିଲେ। ଖବର ପାଇ କଳିଙ୍ଗନଗର ଅତିରକ୍ତ ଆରକ୍ଷୀ ଅଧୀକ୍ଷକ ରାଜକିଶୋର ଦୋରା ଘଟଣାସ୍ଥଳରେ ପହଞ୍ଚତ୍ ଶ୍ରମିକଙ୍କୁ ବୁଝାଶୁଝା କରିଥିଲେ। ହେଲେ ଶ୍ରମିକମାନେ ବକେୟା ଦରମା ପ୍ରଦାନ ଜିଦ୍ରେ ଅଟଳ ରହିଥିଲେ। ତେବେ ଖବର ଲେଖା ହେବା ପର୍ଯ୍ୟନ୍ତ ଶ୍ରମିକମାନେ ଗେଷ୍ଟ ହାଉସ୍ ସମ୍ମୁଖରେ ବସି ଥିବା ଜଣାପଡିଛି।
ପ୍ରକାଶ ଯେ, ମୈଥାନ କାରଖାନା କର୍ମଚାରୀ ବକେୟା ଦରମା ପାଇଁ ସ୍ଥାନୀୟ ଜିଲା ପ୍ରଶାସନ ଓ କାରଖାନା କର୍ତ୍ତୃପକ୍ଷଙ୍କୁ ବହୁ ବାର ଦାବି ପ୍ରଦାନ କରିଥିଲେ। ଏ ନେଇ ଗତ ୨୨ା୧୦ା୧୯ରେ ଯାଜପୁର ଜିଲାପାଳ ରଞ୍ଜନ କୁମାର ଦାସ, କଳିଙ୍ଗନଗର ଅତିରିକ୍ତ ଜିଲାପାଳ ସନ୍ତୋଷ କୁମାର ମିଶ୍ର, ଜିଲା ଶ୍ରମ ଅଧିକାରୀ ଶୁନୀଲ କୁମାର ସାହୁ, ଜିଲା ଆରକ୍ଷୀ ଅଧୀକ୍ଷକ ଚରଣ ସିଂ ମୀନା, ଶ୍ରମିକ ସଂଘ ପକ୍ଷରୁ ପୂର୍ବତନ ଅର୍ଥମନ୍ତ୍ରୀ ପ୍ରଫୁଲ୍ଲ ଚନ୍ଦ୍ର ଘଡ଼ାଇ ଏବଂ କାରଖାନା ନିର୍ଦ୍ଦେଶିକା ସିପ୍ରା ସିଂ ରାଣା ଉପସ୍ଥିତ ଥିଲେ। ଏହି ବୈଠକରେ କାରଖାନା ନିର୍ଦ୍ଦେଶିକା ୩୦ା୧୦ା୧୯ ସୁଦ୍ଧା କର୍ମଚାରୀଙ୍କ ବକେୟା ପାଉଣାର କିଛି ଅଂଶ ଦେବା ସହ କାରଖାନା ଖୁବ୍ଶୀଘ୍ର ଚାଲୁ କରିବା ପାଇଁ ପ୍ରତିଶ୍ରୁତି ଦେଇଥିଲେ। ହେଲେ ବର୍ତ୍ତମାନ ପର୍ଯ୍ୟନ୍ତ କାରଖାନା ଚାଲୁ ହେବା ତ ଦୂରର କଥା ଶ୍ରମିକଙ୍କ ବକେୟା ପାଉଣା ପ୍ରଦାନ କରାଯାଇ ନାହଁି। ଏହାକୁ ନେଇ ଶ୍ରମିକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଇଥିଲା। ମଙ୍ଗଳବାର ମେସ୍କୋ ଗ୍ରୁପ୍ ଅଧ୍ୟକ୍ଷା ରୀତା ସିଂ ଗେଷ୍ଟ୍ ହାଉସ୍କୁ ଆସିବା ଖବର ପାଇ ଶ୍ରମିକ ସଂଘ ସମ୍ପାଦକ ବିଜୟ କୁମାର ଦଳାଇଙ୍କ ନେତୃତ୍ୱରେ ଶ୍ରମିକମାନେ ଘେରାଉ କରିଥିଲେ। ସ୍ବପ୍ନେନ୍ଦୁ ବେହୁରା, ଶ୍ରୀକାନ୍ତ ବେହେରା, କିଶୋର ସାମଲ, ପ୍ରମୋଦ ସାହୁ, ପ୍ରଦୀପ ପାଳ, ସୌମ୍ୟ ରଞ୍ଜନ ନାୟକ, ଶଶିକାନ୍ତ ଦାସ, ରମେଶ ଘଡେଇଙ୍କ ସହ ବହୁ ଶ୍ରମିକ ଧାରଣାରେ ସାମିଲ ହୋଇଛନ୍ତି।