ବନ୍ତଳା,୬।୧୦(ଡି.ଏନ.ଏ.) – ଅନୁଗୋଳ ଜିଲା ବନ୍ତଳା ଥାନା ପୋକତୁଙ୍ଗା ଗ୍ରାମ ପାଟଣାସାହିର ଦାମୋଦର ସାମଲ(୫୮)ଙ୍କ ଶନିବାର ହୃଦଘାତରେ ମୃତ୍ୟୁ ଘଟିଛି। ତାସ ଖେଳୁଥିବାବେଳେ ଛାତିରେ ଯନ୍ତ୍ରଣା ହେବାରୁ ତାଙ୍କୁ ବନ୍ତଳା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରେ ଡାକ୍ତର ମୃତ ଘୋଷଣା କରିଥିଲେ। ପରେ କଳାପାଟ ଛକ ନିକଟରେ ଥିବା ତାଙ୍କ ଜମିରେ ମୃତଦେହ ସତ୍କାର ପାଇଁ ପ୍ରସ୍ତୁତି କରାଯାଇଥିଲା। ତେବେ କାଠରେ ଅଗ୍ନିସଂଯୋଗ ପରେ ଧୂଆଁ ବାହାରିବା ଯୋଗୁ ନିକଟରେ ଥିବା ଏକ ଗଛରେ ଥିବା ବାଘୁଆ ମହୁମାଛି ପଲ ବାହାରି ଆକ୍ରମଣ କରିଥିଲେ। ଏଥିରେ ଗ୍ରାମର ମଣ୍ଟୁ ପ୍ରଧାନ, ପ୍ରତାପ ମହାପାତ୍ର, ପ୍ରବୀଣ ସାମଲ, ଭୁତିଆ ସାହୁ, ସପନା ଦେହୁରୀ, ଶ୍ରୀକାନ୍ତ ଦାସ ଗୁରୁତର ହୋଇଛନ୍ତି। ସେମାନଙ୍କୁ ନିକଟସ୍ଥ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି। ଅନ୍ୟମାନେ ସେଠାରୁ ଦୌଡି ପଳାଇଆସିଥିବା ବେଳେ ସେମାନଙ୍କ ମଧ୍ୟରୁ କେତେଜଣ ଆହତ ହୋଇଥିବା ଜଣାପଡିଛି।
