ଲସବନ,୬।୧୧- ପୂର୍ବତନ ସ୍ପାନିଶ ଅଧିନାୟକ ଲକେର କାସିଲାସ ୬ ମାସ ପୂର୍ବେ ହୃଦ୍ଘାତର ସମ୍ମୁଖୀନ ହେବା ପରେ ପ୍ରଥମ ଥର ପାଇଁ ପଡ଼ିଆକୁ ଫେରିଛନ୍ତି। ୩୮ ବର୍ଷୀୟ ଗୋଲକିପର ନିଜ କ୍ଲବ ପୋର୍ଟୋ ଦଳର ଅନ୍ୟ ଖେଳାଳିଙ୍କ ସହ ଅଭ୍ୟାସ ଆରମ୍ଭ କରିଛନ୍ତି। ୨୦୧୦ ଫିଫା ବିଶ୍ୱକପ୍ ଚାମ୍ପିୟନ ଦଳର ଅଧିନାୟକ ଏ ନେଇ ଟୁଇଟ୍ କରି ଜଣାଇଛନ୍ତି। ନିଜର ବୁଟ୍ର ଫଟୋ ସହ କ୍ୟାପଶନରେ ଲେଖିଛନ୍ତି, ୬ ମାସ ଓ ୩ ଦିନ ଲକରରେ ରହିଛି। ଗତ ମେ’ରେ ଏକ ଟ୍ରେନିଂ ସେସନ ବେଳେ ସେ ହୃଦ୍ଘାତର ସମ୍ମୁଖୀନ ହୋଇଥିଲେ। ତାଙ୍କୁ ତୁରନ୍ତ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଥିଲା। ତାଙ୍କର କାଡିଆକ୍ କେଥିରେଟାଇଜେଶନ କରାଯାଇଥିବା ସୂଚନା ମିଳିଥିଲା। ପରବର୍ତ୍ତୀ ସମୟରେ ପୋର୍ଟୋ କ୍ଲବ ପକ୍ଷରୁ ସେ ସୁସ୍ଥ ଥିବା କୁହାଯାଇଥିଲା। ଉଲ୍ଲେଖଥାଉ କି, କାସିଲାସ ରିଅଲ ମାଡ୍ରିଡ୍ ଦଳର ଦୀର୍ଘ ଦିନ ଧରି ନେତୃତ୍ୱ ନେଇଥିଲେ। ସେଠାରେ ୧୬ ବର୍ଷରେ ୭୨୫ ମ୍ୟାଚ୍ ଖେଳିଥିଲେ। ପରେ ୨୦୧୫ରେ ପର୍ତ୍ତୁଗାଲ କ୍ଲବ ପୋର୍ଟୋ ପାଇଁ ଖେଳିବା ଆରମ୍ଭ କରିଥିଲେ।