ରାଞ୍ଚି,୨୮।୧୨: ଝାଡ଼ଖଣ୍ଡ ମୁକ୍ତି ମୋର୍ଚ୍ଚା(ଜେଏମ୍ଏମ୍)ର କାର୍ଯ୍ୟକାରୀ ଅଧ୍ୟକ୍ଷ ହେମନ୍ତ ସୋରେନ ରବିବାର ଝାଡ଼ଖଣ୍ଡର ମୁଖ୍ୟମନ୍ତ୍ରୀ ଭାବେ ଶପଥ ନେବାର କାର୍ଯ୍ୟକ୍ରମ ରହିଛି। ହେଲେ ଏପର୍ଯ୍ୟନ୍ତ ତାଙ୍କ ସହ ଆଉ କିଏ ଶପଥ ନେବେ ତାହା ସ୍ଥିର ହୋଇପାରିନାହିଁ। କାରଣ ଅଳ୍ପ ପଦକୁ ଅଧିକ ପ୍ରାର୍ଥୀ ଥିବାରୁ ଏଭଳି ସମସ୍ୟା ଉପୁଜିଥିବା କୁହାଯାଉଛି। ଆଲୋଚନା ହେଉଛି କି ହେମନ୍ତଙ୍କ ସହ ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ଜଣେ ଓ କଂଗ୍ରେସର ଜଣେ ମନ୍ତ୍ରୀ ଶପଥ ନେଇପାରନ୍ତି। ଆହୁରି ମଧ୍ୟ ଆଲୋଚନା ହେଉଛି କି ଏହି ମାସରେ ମନ୍ତ୍ରୀମଣ୍ଡଳର ଗଠନ କରିବା ଶୁଭ ହୋଇ ନ ଥିବାରୁ କେହି ଶପଥ ନେଇ ନ ପାରନ୍ତି। ପୁଣି ଶୁଣିବାକୁ ମିଳୁଛି କ୍ୟାବିନେଟରେ ସବୁ ମନ୍ତ୍ରୀଙ୍କ ଶପଥ ଗ୍ରହଣ କରାଯାଇ ନ ପାରେ। ଏଥିରୁ ଅନୁମାନ କରାଯାଉଛି ରବିବାର ସୋରେନ ଶପଥ ଗ୍ରହଣ କରିବା ପରେ ହୁଏତ ସବୁ କଳ୍ପନା ଜଳ୍ପନାର ଅନ୍ତ ଘଟିପାରେ।