କେନ୍ଦ୍ରାପଡା ଅଫିସ/ ମହାକାଳପଡା (ଡି.ଏନ.ଏ.)୨୦।୩: କେନ୍ଦ୍ରାପଡା ଜିଲାରେ ଅନୁପ୍ରବେଶକୁ ଜିଲା ପୋଲିସ ଗୁରୁତ୍ୱ ଦେଉନାହିଁ। ଏପରି କି କରୋନା ଭୂତାଣୁ ସଂକ୍ରମଣ ପାଇଁ ରାଜ୍ୟ ସରକାରଙ୍କ ଜାରି ହୋଇଥିବା କଟକଣାକୁ ଜିଲା ପୋଲିସ ବେଖାତିର କରିଛି। ଏପରି ଘଟଣା ଏହି ଜିଲା ଅନ୍ତର୍ଗତ ଜମ୍ବୁ ସାମୁଦ୍ରିକ ଥାନାରେ ଦେଖିବାକୁ ମିଳିଛି। ଗତ ୩ ଦିନ ପୂର୍ବେ ଥାନା ଅଧୀନ ରାମନଗର ପଞ୍ଚାୟତ ପିତାପାଟ (ନଳଗୋଠ) ଗ୍ରାମର ଶ୍ରୀପଦ ମଣ୍ଡଳ ଓ ଧନଞ୍ଜୟ ମଣ୍ଡଳଙ୍କ ଘରେ ଦୁଇ ବାଂଲାଦେଶୀ ପରିବାର ଆସି ରହୁଛନ୍ତି। ଏନେଇ ପୂର୍ବାହ୍ନରେ ଜିଲା ପୋଲିସକୁ ସୂଚନା ମିଳିବା ପରେ ଜମ୍ବୁ ସାମୁଦ୍ରିକ ଥାନା ପୋଲିସ ସମ୍ପୃକ୍ତ ଦୁଇ ବାଂଲାଦେଶୀ ପରିବାରର ୫ ସଦସ୍ୟଙ୍କୁ ଥାନାକୁ ଆଣିଥିଲା। ସେମାନଙ୍କୁ ପଚରାଉଚରା ପରେ ଛାଡିଦେଇଛି। ଏପରିକି ସେମାନଙ୍କୁ କରୋନା ପଞ୍ଜୀକରଣ କରାଯାଇନାହିଁ। ସେମାନେ ହେଲେ ବାଂଲାଦେଶ ସତକିରା ଜିଲା ଶାମନଗର ଥାନା ସତକିରାର ସୁଧାଂଶୁ ମଣ୍ଡଳ (୬୯), ସ୍ତ୍ରୀ ସବିତା ମଣ୍ଡଳ (୬୮) ଓ ସତକିରା ଜିଲା ଶାମନଗର ଥାନା ସୋନମୁଗରା ଗ୍ରାମର ସନ୍ଦୀପ ମଣ୍ଡଳ (୩୬), ସ୍ତ୍ରୀ ଅନିତାରାଣୀ ମଣ୍ଡଳ ଓ ୬ ବର୍ଷର ପୁଅ। ଏହି ଦୁଇ ପରିବାର ଭାରତକୁ ଗତ ଫେବୃୟାରୀ ୨୪ ଓ ମାର୍ଚ୍ଚ ୨ରେ ପ୍ରବେଶ କରିଛନ୍ତି। ଇତିମଧ୍ୟରେ ସେମାନେ କଲିକତା ଓ ପୁରୀ ପରେ ପିତାପାଟ ଗ୍ରାମରେ ରହି ଆସୁଛନ୍ତି। ରାଜ୍ୟରେ କରୋନା ପାଇଁ ଭୟର ବାତାବରଣ ଖେଳି ଯାଇଥିବା ବେଳେ ଖୋଲାମେଲାରେ ବାଂଲାଦେଶୀଙ୍କ ଏଠାରେ ରହଣିକୁ ସ୍ଥାନୀୟ ଅଞ୍ଚଳରେ ସହଜରେ ଗ୍ରହଣ କରୁନାହାନ୍ତି।