ବଅଁରପାଳ, ୧।୧୦ (ଡି.ଏନ୍.ଏ.)-
ତାଳଚେରସ୍ଥିତ ଏମ୍ସିଏଲ୍ର କୋଇଲା ଖଣିରୁ ଆନ୍ଦୋଳନ ହଟିଯାଇଥିଲେ ବି ରାଷ୍ଟ୍ରାୟତ ଉଦ୍ୟୋଗ ନାଲ୍କୋକୁ ଆବଶ୍ୟକ ପରିମାଣର କୋଇଲା ଯୋଗାଣ ହୋଇପାରୁ ନାହିଁ। ଫଳରେ କିଛିଦିନ ହେଲା ନାଲ୍କୋ ନିଜସ୍ବ ବିଦ୍ୟୁତ୍ ପ୍ଲାଣ୍ଟ (ସିପିପି)ର ଗୋଟିଏ ପରେ ଗୋଟିଏ ୟୁନିଟ୍ ବନ୍ଦ ହେବାରେ ଲାଗିଛି। ପୂର୍ବରୁ ସିପିପିର ୫ଟି ୟୁନିଟ୍ ବନ୍ଦ ରହିଥିବା ବେଳେ ସୋମବାର ଆଉ ଏକ ୟୁନିଟ୍କୁ ବନ୍ଦ କରାଯାଇଥିବା ସୂଚନା ମିଳିଛି। ଏଥିଯୋଗୁ ଶକ୍ତି ଉତ୍ପାଦନ ହ୍ରାସ ପାଇଥିବାରୁ ପ୍ରକଳ୍ପ ଚଳାଇବା ପାଇଁ ନାଲ୍କୋ କର୍ତ୍ତୃପକ୍ଷଙ୍କୁ ବାହାରୁ ଚଢ଼ା ଦରରେ ବିଦ୍ୟୁତ୍ କିଣିବାକୁ ପଡ଼ୁଛି।
ପ୍ରକାଶ ଯେ, ନାଲ୍କୋ ସିପିପିର ମୋଟ୍ ୧୦ଟି ୟୁନିଟ୍ରୁ ଦୈନିକ ୧୨ଶହ ମେଗାଓ୍ବାଟ୍ ବିଦ୍ୟୁତ୍ ଉତ୍ପାଦିତ ହୋଇଥାଏ। ଏହା କାର୍ଯ୍ୟକ୍ଷମ ପାଇଁ ଏମ୍ସିଏଲ୍ରୁ ପ୍ରତିଦିନ ୧୫ରୁ ୧୬ ହଜାର ମେଟ୍ରିକ ଟନ୍ କୋଇଲା ଯୋଗାଇ ଦିଆଯାଇଥାଏ। କିନ୍ତୁ ଏବେ ୬ରୁ ୭ ହଜାର ମେଟ୍ରିକ ଟନ୍ କୋଇଲା ଆସୁଥିବାରୁ ତାହା ୪ଟି ୟୁନିଟ୍ ଚଳାଇବା ପାଇଁ ପର୍ଯ୍ୟାପ୍ତ ହେଉନାହିଁ। କାରଣ ସେଥିରୁ ବହୁ ପରିମାଣର କୋଇଲା ବ୍ୟବହାର ଉପଯୋଗୀ ନୁହେଁ। ଏହାଛଡ଼ା ଷ୍ଟକୟାର୍ଡରେ ବର୍ତ୍ତମାନ ପ୍ରାୟ ୩୫ ହଜାର ମେଟ୍ରିକ ଟନ୍ କୋଇଲା ଗଚ୍ଛିତ ରହିଛି। ତେଣୁ କର୍ତ୍ତୃପକ୍ଷ ମାତ୍ର ୪ଟି ୟୁନିଟ୍ ଚାଲୁ ରଖି ୪୨୦ ମେଗାୱାଟ ବିଦ୍ୟୁତ୍ ଶକ୍ତି ଉତ୍ପାଦନ କରିପାରୁଛନ୍ତି। ସିପିପିରେ ବିଦ୍ୟୁତ୍ ଉତ୍ପାଦନ କମିଯିବା ପରେ ସ୍ମେଲଟରର ପଟ୍ଗୁଡ଼ିକ ଲୋ-ଆମ୍ପିୟରରେ ଚାଲିଛି। ଏଥିଯୋଗୁ ଆଲୁମିନିୟମ ଉତ୍ପାଦନ ମଧ୍ୟ ହ୍ରାସ ପାଇଛି। ଏ ସମ୍ପର୍କରେ ନାଲ୍କୋ ଶ୍ରମିକ କଂଗ୍ରେସ ୟୁନିୟନର ବିଭବ ଜେନା କୁହନ୍ତି, ଏମ୍ସିଏଲ୍ରୁ ଯୋଗାଣ ହେଉଥିବା କୋଇଲାରେ ବହୁ ପଥର ଆସୁଛି। ଫଳରେ କୋଲ୍ ହ୍ୟାଣ୍ଡଲିଂ ପ୍ଲାଣ୍ଟର କ୍ରଶର ଓ ମିଲ୍ ବହୁ ସମୟରେ ବ୍ରେକ୍ ଡାଉନ୍ ହୋଇଯାଉଥିବା ଦେଖାଯାଉଛି। ନାଲ୍କୋର ଜଣେ ଅଧିକାରୀ କହିଛନ୍ତି, କୋଇଲା ସମସ୍ୟା ଯୋଗୁ ପ୍ଲାଣ୍ଟର ୬ଟି ୟୁନିଟ୍କୁ ବନ୍ଦ ରଖାଯାଇଛି।