ବେଙ୍ଗାଲୁରୁ,୧୯।୭: ଗୁରୁବାର ଦିନ ଶେଷ ସୁଦ୍ଧା ଟ୍ରଷ୍ଟ ଭୋଟ ସାରିବା ପାଇଁ ରାଜ୍ୟପାଳ ବାଜୁଭାଇ ବାଲାଙ୍କ ନିର୍ଦ୍ଦେଶକୁ ବାଚସ୍ପତି କେଆର ରମେଶ କୁମାର ନ ମାନିବା କର୍ନାଟକ ନାଟକକୁ ଆହୁରି ରୋଚକ ସ୍ଥିତିକୁ ନେଇଯାଇଛି। ତାଙ୍କର ଏପରି ନିଷ୍ପତ୍ତି ଫଳରେ ଏଚଡି କୁମାରସ୍ବାମୀଙ୍କ ନେତୃତ୍ୱାଧୀନ କଂଗ୍ରେସ-ଜେଡିଏସ ମେଣ୍ଟ ସରକାର ଗୋଟିଏ ଦିନ ପାଇଁ ଆସ୍ଥା ଭୋଟକୁ ଟାଳିଦେଇ ପାରିଥିଲା। ଅନ୍ୟପକ୍ଷରେ ଏହା ବିରୋଧରେ ଭାଜପା ରାତିସାରା ବିଧାନସଭା ଭିତରେ ଧାରଣାରେ ବସିଛି। ଦଳର ବିଧାୟକମାନେ ତଳେ ଚଦର ପାରି ଶୋଇଥିଲେ। ଶାସକ ଦଳର ବିଧାୟକମାନେ ହୋ ହଲ୍ଲା କରି ଗୃହକୁ ଏକ ପ୍ରକାର ଅଚଳ କରିବାରେ ସମର୍ଥ ହୋଇଥିଲେ। ଫଳରେ ଉପବାଚସ୍ପତି କ୍ରିଷ୍ଣା ରେଡ୍ଡି ଗୃହକୁ ବିନା ଟ୍ରଷ୍ଟ ଭୋଟରେ ମୁଲତବୀ ଘୋଷଣା କରିଥିଲେ। ଶୁକ୍ରବାର ସକାଳ ୧୧ଟା ଯାଏ ଗୃହ ମୁଲତବୀ ରହିଛି।