ବସ୍ତା, ୨୮।୮(ସ୍ବ.ପ୍ର.) – ଗତ କିଛି ଦିନ ଧରି ଉପରମୁଣ୍ଡରେ ଏବଂ ସ୍ଥାନୀୟ ଅଞ୍ଚଳରେ ବର୍ଷା ଯୋଗୁ ବସ୍ତା ବ୍ଲକ ଦେଇ ପ୍ରବାହିତ ନଦୀ ଜଳକା ବିପଦ ସଂକେତ ଊର୍ଦ୍ଧ୍ୱରେ ପ୍ରବାହିତ ହେଉଛି। ମଥାନୀଠାରେ ନଦୀର ଜଳସ୍ତର ୫.୫୦ ମିଟର ଥିବାବେଳେ ମଙ୍ଗଳବାର ସନ୍ଧ୍ୟା ୭ଟାରେ ଏହି ନଦୀ ୬.୩୮ ମିଟରରେ ପ୍ରବାହିତ ହେଉଛି।
ନଦୀର ଜଳସ୍ତର କ୍ରମଶଃ ହ୍ରାସ ପାଉଥିବା ଜଳସେଚନ ବିଭାଗ କାର୍ଯ୍ୟାଳୟ ପକ୍ଷରୁ କୁହାଯାଇଛି। ଜଳସ୍ତର ବୃଦ୍ଧି ଯୋଗୁ ନଦୀ ପାର୍ଶ୍ୱ କିଛି ଚାଷ ଜମି ଜଳମଗ୍ନ ହୋଇଥିବା ବେଳେ ବନ୍ୟା ପ୍ରଭାବରେ ସେଭଳି କିଛି କ୍ଷୟକ୍ଷତି ହୋଇନାହିଁ। ବନ୍ୟା ଓ ବର୍ଷା ପାଣି ନିଷ୍କାସନରେ ବାଧା ଉପୁଜିବା ଯୋଗୁ ବସ୍ତା ବ୍ଲକ ମଥାନୀ ପଞ୍ଚାୟତର ସାନଖୁଡ଼ି ଗ୍ରାମ ପାର୍ଶ୍ୱରେ ଥିବା ୧୦୦ ପରିବାର ଜଳବନ୍ଦୀ ହୋଇ ରହିଛନ୍ତି। ମଥାନୀ ପଞ୍ଚାୟତର ଏହି ପରିବାର ୩ ନଂ ଓ ୪ନଂ ୱାର୍ଡ଼ ମଧ୍ୟରେ ରହୁଛନ୍ତି। ଏହି ଲୋକମାନେ ଜଳ ଘେରରେ ରହିଥିବା ଖବର ପାଇ ବସ୍ତା ତହସିଲଦାର ନରେନ୍ଦ୍ର ଖମାରୀ ଲୋକଙ୍କ ପାଖରେ ପହଞ୍ଚତ୍ ସେମାନଙ୍କ ସ୍ଥିତି ଅନୁଧ୍ୟାନ କରିଥିଲେ। ମଙ୍ଗଳବାର ବାଲେଶ୍ୱର ଉପଜିଲାପାଳ ନୀଲୁ ମହାପାତ୍ର, ତହସିଲଦାର ନରେନ୍ଦ୍ର ଖମାରୀ, ବସ୍ତା ବିଡିଓ କୁକୁମୀନା ଦାସଙ୍କ ସମେତ ଡ୍ରେନେଜ, ଇରିଗେସନ, ପୂର୍ତ୍ତ ବିଭାଗ, ରାଜପଥ ଅଧିକାରୀ ସେଠାରେ ପହଞ୍ଚତ୍ ସ୍ଥିତି ପରଖିବା ସହ ଏହି ସମସ୍ୟାକୁ ଦୂରୀଭୁତ କରାଯାଇପାରିବ ସେନେଇ ଆଲୋଚନା କରିଥିଲେ। ବାରମ୍ବାର ଏଭଳି ସମସ୍ୟା ଘଟୁଥିବାରୁ ସ୍ଥାନୀୟ ଲୋକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ଏହାର ସ୍ଥାୟୀ ସମାଧାନ ନ ହେବା ପର୍ଯ୍ୟନ୍ତ ପ୍ରଶାସନ ଏହି ଜଳବନ୍ଦୀଙ୍କ ଉପରେ ସର୍ତକ ଦୃଷ୍ଟି ରଖିଥିବା ନରେନ୍ଦ୍ର ଖମାରୀ ପ୍ରକାଶ କରିଛନ୍ତି।
