କଟକ ଅଫିସ,୧୯।୩: କରୋନା ଭୂତାରୁ ସଂକ୍ରମଣକୁ ରୋକିବା ପାଇଁ ଆବଶ୍ୟକ ସ୍ଥଳେ ହୋଟେଲ ରୁମ୍କୁଗୁଡ଼ିକୁ ଆଇସୋଲେଶନ୍ ୱାର୍ଡ ଭାବେ ବ୍ୟବହାର କରାଯିବ। ହୋଟେଲ ରୁମରେ ରହୁଥିବା ବ୍ୟକ୍ତିବିଶେଷ କରୋନାରେ ଆକ୍ରାନ୍ତ ହୋଇଛନ୍ତି ବୋଲି ସନ୍ଦେହ କରାଗଲେ ତାଙ୍କୁ ବାହାରକୁ ନିଆଯିବା ଅପେକ୍ଷା ସେଠାରେ ହିଁ ସ୍ବାସ୍ଥ୍ୟସେବା ଯୋଗାଇ ଦିଆଯିବ। କଟକ ମହାନଗର ନିଗମ(ସିଏମ୍ସି) ଏଭଳି ନିଷ୍ପତ୍ତି ନେଇଥିବା ବିଶେଷସୂତ୍ରରୁ ଜଣାପଡ଼ିଛି। ବୁଧବାର ସହରର ହୋଟେଲ ମାଲିକଙ୍କୁ ନେଇ ଡକାଯାଇଥିବା ବୈଠକରେ ଏ ଆଲୋଚନା କରାଯାଇଛି। ସିଏମ୍ସି ପକ୍ଷରୁ ସହରର ୫୦ଟି ହୋଟେଲ ମାଲିକଙ୍କ ସହ ଯୋଗାଯୋଗ କରାଯାଇଥିଲା। ୩୫ହୋଟେଲ ମାଲିକ ଏବଂ ଅନେକ ବରିଷ୍ଠ ପଦାଧିକାରୀ ବୈଠକରେ ଯୋଗ ଦେଇଥିଲେ। ଅନ୍ୟପକ୍ଷରେ ସିଏମ୍ସି ପରିସରରୁ ଜଣେ ବ୍ୟକ୍ତିଙ୍କୁ କରୋନା ସନ୍ଦେହରେ ବୁଧବାର ଏସ୍ସିବିର ଆଇସୋଲେଶନ ୱାର୍ଡରେ ଭର୍ତ୍ତି କରାଯାଇଛି। ବ୍ୟକ୍ତିଙ୍କ ଘର କଟକରେ ଥିବାବେଳେ ସେ ସିଙ୍ଗାପୁରରୁ ଫେରିଥିଲେ। ବୁଧବାର ବ୍ୟକ୍ତିଗତ କାର୍ଯ୍ୟରେ ସେ ସିଏମ୍ସିକୁ ଆସିଥିବାବେଳେ ତାଙ୍କୁ ଅଟକ ରଖାଯାଇଥିଲା ।