କୋରେଇ,୮।୭(ସ୍ବ.ପ୍ର.): ଯାଜପୁର ଜିଲା ଏସ୍ପି ଅଫିସ୍ଠାରୁ ମାତ୍ର ୨୦୦ ମିଟର ଦୂର ପାଣିକୋଇଲି ବଜାରରେ ଥିବା ଏକ ହୋଟେଲରୁ ପୋଲିସ ରବିବାର ସକାଳେ ରକ୍ତ ଜୁଡୁବୁଡ଼ୁ ଅବସ୍ଥାରେ ହୋଟେଲ ମାଲିକଙ୍କ ମୃତଦେହ ଉଦ୍ଧାର କରିଛି। ମୃତକ ହେଲେ ସ୍ଥାନୀୟ ପାଣିକୋଇଲି ଗ୍ରାମର ରବୀନ୍ଦ୍ର ସାହୁ। ଶନିବାର ବିଳମ୍ବିତ ରାତିରେ କେହି ରବୀନ୍ଦ୍ରଙ୍କ ଗଳାକାଟି ହତ୍ୟା କରିଥିବା ଅନୁମାନ କରାଯାଉଛି। ରବୀନ୍ଦ୍ରଙ୍କ ଭାଇ ଗୋବିନ୍ଦ ଥାନାରେ ଖବର ଦେବା ପରେ ପାଣିକୋଇଲି ଥାନାଧିକାରୀ ଓ ଯାଜପୁରରୋଡ ଏସ୍ଡିପିଓ କେଦାରନାଥ ସାହୁ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ଅଭିଯୋଗକୁ ଭିତ୍ତିକରି ପୋଲିସ ଏକ ମାମଲା (ନଂ.୧୨୨/୧୯) ରୁଜୁ କରିଛି। ଏହି ହତ୍ୟାକାଣ୍ଡରେ ଏକ ଅସାମାଜିକ ଗୋଷ୍ଠୀର ହାତ ଥିବା ଗୋବିନ୍ଦ ପୋଲିସକୁ କହିଥିବାବେଳେ ପୋଲିସ ରବୀନ୍ଦ୍ରଙ୍କ ସ୍ତ୍ରୀ ଜୁମା ଓ ଶାଶୁଙ୍କୁ ଅଟକ ରଖି ପଚରାଉଚୁରା କରୁଛି। ଏଥିସହ ମୃତଦେହ ଉଦ୍ଧାର କରି ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିବାବେଳେ ସାଇଣ୍ଟିଫିକ୍ ଟିମ୍ ପହଞ୍ଚି ଯାଞ୍ଚ ଆରମ୍ଭ କରିଛି। ହତ୍ୟାକାଣ୍ଡର କାରଣ ସ୍ପଷ୍ଟ ହୋଇ ନ ଥିବାବେଳେ ପାରିବାରିକ ଅଶାନ୍ତି ନେଇ ତାଙ୍କୁ ହତ୍ୟା କରାଯାଇଥିବା ପୋଲିସ ସନ୍ଦେହ କରୁଛି। ପୋଲିସ ହତ୍ୟାକାଣ୍ଡ ସ୍ଥଳରୁ ଏକ ଛୁରି ଓ ରବୀନ୍ଦ୍ରଙ୍କ ରକ୍ତଭିଜା ଲୁଗା ଜବତ କରିଛି। ଏହି ଘଟଣାରେ ତାଙ୍କ ଶଳା ଓ ଶଳାଭାଉଜ ସମ୍ପୃକ୍ତ ଥିବା ପୋଲିସ ସନ୍ଦେହ କରୁଥିବାବେଳେ ସେମାନେ ଫେରାର ଅଛନ୍ତି। ମିଳିଥିବା ସୂଚନା ଅନୁଯାୟୀ, ଗତ କିଛିଦିନ ଧରି ରବୀନ୍ଦ୍ର ନିଜ ପରିବାରକୁ ଛାଡି କେତେଜଣ ଅସାମାଜିକ ବ୍ୟକ୍ତିଙ୍କ ସହିତ ମିଳାମିଶା କରୁଥିଲେ। ସେମାନଙ୍କ ସହ ମିଶି ନିଶା ସେବନ କରୁଥିବା ତାଙ୍କ ସମ୍ପର୍କୀୟ ସୂଚନା ଦେଇଛନ୍ତି। ତେବେ ପୂର୍ବରୁ ରବୀନ୍ଦ୍ର ଯୌତୁକ ନିର୍ଯାତନା ମାମଲାରେ କିଛିଦିନ ପାଇଁ ଜେଲ ଯାଇଥିଲେ। ପାରିପାର୍ଶ୍ୱିକ ସ୍ଥିତିରୁ ହତ୍ୟାକାଣ୍ଡରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ପୋଲିସ ସନ୍ଦେହ କରୁଥିବାବେଳେ ଚୋରା ନିଶା ବ୍ୟବସାୟୀଙ୍କ ହାତ ଥିବା ନେଇ ମଧ୍ୟ ପାଣିକୋଇଲି ଅଞ୍ଚଳରେ ଚର୍ଚ୍ଚା ହେଉଛି।