ହୋବାର୍ଟ, ୧୨।୧ (ପି.ଟି.)- ଭାରତୀୟ ଟେନିସ ଷ୍ଟାର୍ ସାନିଆ ମିର୍ଜା କୋର୍ଟକୁ ପ୍ରତ୍ୟାବର୍ତ୍ତନ ପରେ ହୋବାର୍ଟ ଇଣ୍ଟରନ୍ୟାଶନାଲରେ ପ୍ରଥମ ମ୍ୟାଚ୍ ଖେଳିବେ। ମହିଳା ଡବଲ୍ସରେ ୟୁକ୍ରେନର ନାଡିଆ କିଚେଙ୍କୋ’ଙ୍କୁ ସାଥୀ କରି ସାନିଆ ଅଭିଯାନ ଆରମ୍ଭ କରିବେ। ମଙ୍ଗଳବାର ଖେଳାଯିବାକୁ ଥିବା ପ୍ରଥମ ରାଉଣ୍ଡ ମୁକାବିଲାରେ ସାନିଆ-ନାଡିଆ ଯୋଡ଼ି ଜର୍ଜିଆର ଓକସାନା କାଲଶନିକୋଭ ଓ ଜାପାନର ମିୟୁ କାଟୋଙ୍କୁ ଭେଟିବେ। ସେହିଭଳି ଯଦି ଏହି ଅନ୍ସିଡ ଇଣ୍ଡୋ-ୟୁକ୍ରେନିଆନ ଯୋଡ଼ି ବିଜୟୀ ହୁଅନ୍ତି ତେବେ କ୍ୱାର୍ଟର ଫାଇନାଲରେ ସ୍ପେନର ଗେର୍ଗିନା ଗ୍ରାସିଆ ପେରେଜ ଓ ସାରା ସୋରିବେଜ ଟର୍ମୋସଙ୍କୁ ସାମ୍ନା କରିବେ। ମାତୃତ୍ୱ ଲାଭ କରିବା ପରେ ସାନିଆ ମିର୍ଜା ଦୀର୍ଘ ୨ ବର୍ଷର ବ୍ୟବଧାନ ପରେ ଟେନିସ କୋର୍ଟକୁ ପ୍ରତ୍ୟାବର୍ତ୍ତନ କରିବାକୁ ଯାଉଛନ୍ତି। ୨୦୧୦ରେ ସେ ପାକିସ୍ତାନ କ୍ରିକେଟର୍ ସୋଏବ ମଲିକଙ୍କୁ ବିବାହ କରିଥିଲେ।