ତାଳଚେର,୧୬ା୧୦(ନି.ପ୍ର.)-ବ୍ୟସ୍ତବହୁଳ ଜୀବନରେ ତରବରିଆ ଥିବା ମଣିଷ ବେଳେ ବେଳେ ନିଜ ଗୁରୁତ୍ୱପୂର୍ଣ୍ଣ ସାମଗ୍ରୀ ହଜାଇ ଦେଇଥାନ୍ତି। କିଏ ନିଜ ଜରୁରୀ କାଗଜପତ୍ର ଗାଡ଼ିରେ ଛାଡ଼ି ଦେଇଥାନ୍ତି ତ ଆଉ କିଏ ପକେଟରୁ ପର୍ସ ଖସି ପଡ଼ିଲେ ବି ଜାଣି ନ ପାରି ଗନ୍ତବ୍ୟ ପଥରେ ଚାଲିଯାଇଥାନ୍ତି। ହେଲେ ଅଜାଣତରେ ହୋଇଯାଇଥିବା ଉକ୍ତ ତ୍ରୁଟି ସମ୍ପର୍କରେ ଅବଗତ ହୋଇଥିବା ମଣିଷର ମନ କିପରି ବ୍ୟାକୁଳ ହେଉଥିବ ସେ ସମ୍ପର୍କରେ ଅନେକେ ହୁଏତ ଚିନ୍ତା ମଧ୍ୟ କରି ନ ଥାନ୍ତି। କେହି କେହି ପାଇଥିବା ଅର୍ଥକୁ ଈଶ୍ୱରଙ୍କ ଆଶିଷ ବୋଲି ଗ୍ରହଣ ବି କରିନେଇଥାନ୍ତି। କିନ୍ତୁ ଏପରି ଏକ ଘଟଣାରେ ନିଜ ନିଆରା ହୃଦୟର ପରିଚୟ ଦେଇ ଅନ୍ୟମାନଙ୍କ ପାଇଁ ଉଦାହରଣ ସାଜିଛନ୍ତି ଅନୁଗୋଳ ଜିଲା ତାଳଚେର ଡିଆଇଜିଙ୍କ କାର୍ଯ୍ୟାଳୟର ହୋମଗାର୍ଡ ମାନସ ରଞ୍ଜନ ମହାପାତ୍ର।
ତାଳଚେର କଙ୍କିଳି ଗ୍ରାମର ମାନସ ସୋମବାର ପୂର୍ବାହ୍ନ ୮ଟା ୩୦ରେ ଅଫିସ ଯାଉଥିବା ବେଳେ ଟିଟିପିଏସ୍-ବହ୍ଲର ରାସ୍ତାରୁ ଏକ ମନିପର୍ସ ପାଇଥିଲେ। ସେଥିରେ କିଛି ଟଙ୍କା ସହ ଆଧାର କାର୍ଡ, ଭୋଟର ପରିଚୟପତ୍ର ଆଦି ଗୁରୁତ୍ୱପୂର୍ଣ୍ଣ କାଗଜପତ୍ର ଥିଲା। ଏ ସମ୍ପର୍କରେ ମାନସ ତୁରନ୍ତ ଡିଆଇଜିଙ୍କ ବ୍ୟକ୍ତିଗତ ସଚିବ ଶିବୁ ହାଂସଦାଙ୍କୁ ଜଣାଇଥିଲେ। ଶିବୁ କାଗଜପତ୍ରରୁ ଉକ୍ତ ପର୍ସ ତୁମୁସିଂହା ଗ୍ରାମର ଅମରୀଶ ନାୟକଙ୍କର ବୋଲି ଜାଣିବା ସହ ତୁମୁସିଂହା ଥାନା ଓ ଆଇଆଇସିଙ୍କୁ ଯୋଗାଯୋଗ କରିଥିଲେ। ତୁମୁସିଂହା ଆଇଆଇସି ଅମରୀଶଙ୍କୁ ତାଳଚେର ଯାଇ ହଜିଯାଇଥିବା ପର୍ସ ଆଣିବା ନିମନ୍ତେ ଖବର ଦେବା ପରେ ଅମରୀଶ ଆନନ୍ଦରେ ଅଧୀର ହୋଇପଡ଼ିଥିଲେ। ସେ ତୁରନ୍ତ ତାଳଚେର ଡିଆଇଜିଙ୍କ ଅଫିସରେ ପହଞ୍ଚି ବ୍ୟକ୍ତିଗତ ସଚିବ ଶିବୁ ହାଂସଦାଙ୍କ ଉପସ୍ଥିତିରେ ହୋମଗାର୍ଡ ମାନସଙ୍କ ଠାରୁ ନିଜର ହଜି ଯାଇଥିବା ପର୍ସ ଓ କାଗଜପତ୍ର ଫେରି ପାଇଥିଲେ। ମାନସଙ୍କ ଏଭଳି ମାନବିକତା ପାଇଁ ଅମୀରଶ ତାଙ୍କୁ ଧନ୍ୟବାଦ ଦେବା ସହ କୃତଜ୍ଞତା ମଧ୍ୟ ଜଣାଇଥିଲେ।