ମୁମ୍ବାଇ, ୨୨।୭ (ପି.ଟି.)-ଓ୍ବେଲ୍ସର କାର୍ଡିଫ୍ଠାରେ ଜୁଲାଇ ୨୭ରୁ ବାର୍ଷିକ ହୋମ୍ଲେସ ଓ୍ବାଲର୍ଡ କପ୍ ଅନୁଷ୍ଠିତ ହେବ। ଏଥିରେ ଭାରତୀୟ ମହିଳା ଓ ପୁରୁଷ ଫୁଟ୍ବଲ ଦଳ ଯଥାକ୍ରମେ ସୁଜାତା ରାୟ ଏବଂ ଅମ୍ରିତ ପାଲ୍ ସିଂଙ୍କ ଅଧିନାୟକତ୍ୱରେ ଅଂଶଗ୍ରହଣ କରିବ। ସିଂ ପଞ୍ଜାବ ରାଜ୍ୟର ଭଟିଣ୍ଡା ବାସିନ୍ଦା ହୋଇଥିବାବେଳେ ସୁଜାତାଙ୍କ ବାସସ୍ଥାନ ହେଉଛି ପଶ୍ଚିମବଙ୍ଗରେ। ହୋମ୍ଲେସ୍ ଓ୍ବାଲର୍ଡକପ୍ ଫାଉଣ୍ଡେଶନ ହେଉଛି ଏହି ଇଭେଣ୍ଟର ଆୟୋଜକ। ଉଭୟ ମହିଳା ଓ ପୁରୁଷ ଦଳ ଦୁଇ ସପ୍ତାହ ହେଲା ଏକତ୍ର ନାଗପୁରରେ ଅଭ୍ୟାସ ଚଳାଇ ଆସୁଛନ୍ତି। ଖେଳାଳିମାନେ କିପରି ଉଭୟ ଶାରୀରିକ ଓ ମାନସିକ ସ୍ତରରେ ଅଧିକ ସୁଦୃଢ ହୋଇପାରିବେ ଏ ଦିଗରେ ବିଶେଷ ଧ୍ୟାନ ଦିଆଯାଇଥିଲା ବୋଲି ଭାରତୀୟ ଦଳର ମୁଖ୍ୟ କୋଚ୍ ହୋମ୍କାନ୍ତ ସୁରାଣ୍ଡେଜ୍ ଏଠାରେ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଖେଳାଳିମାନେ ପ୍ରସ୍ତୁତିବେଳେ ଇଂଲିଶ ପ୍ରିମିୟର ଲିଗ୍ କ୍ଲବ ଟୋଟେନହାମ୍ର ସହାୟତା ନେଇଥିଲେ। ନାଗ୍ପୁରରେ ଟୋଟେନହାମ୍ର ୪ଜଣ କୋଚ୍ ଏକ ସପ୍ତାହ ଧରି ଆମକୁ ଖେଳର ଟେକ୍ନିକ୍ ସମ୍ପର୍କରେ ଦିଗଦର୍ଶନ ଦେଇଥିଲେ ବୋଲି ୨୩ ବର୍ଷୀୟ ଅମ୍ରିତ କହିଛନ୍ତି। ଟୋଟେନହାମ କୋଚ୍ଙ୍କ ସହାୟତା ଯୋଗୁ ଖେଳାଳିମାନଙ୍କ ପ୍ରଦର୍ଶନରେ ଉନ୍ନତି ଘଟିଛି ବୋଲି ରାୟ କହିଛନ୍ତି। ଖବରଦାତା ସମ୍ମିଳନୀରେ ସ୍ଲମ ଫୁଟ୍ବଲର ପୃଷ୍ଠପୋଷକ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡ୍ନବିସ୍ଙ୍କ ସ୍ତ୍ରୀ ଉପସ୍ଥିତ ଥିଲେ।