ଭଞ୍ଜନଗର,୬।୫(ଡି.ଏନ.ଏ.)- ସୁରଟରୁ ଫେରୁଥିବା ମହିଳାମାନଙ୍କୁ ହୋମ୍ କ୍ୱାରାଣ୍ଟାଇନ୍ରେ ରହିବାକୁ ନିଆଯାଇଥିବା ନିଷ୍ପତ୍ତିକୁ ନେଇ ଭଞ୍ଜନଗର ବ୍ଲକର ଏକ ଗ୍ରାମରେ ମଙ୍ଗଳବାର ସନ୍ଧ୍ୟାରେ ଉତ୍ତେଜନା ଦେଖାଦେଇଛି। ୪ ମହିଳାଙ୍କୁ ନେଇ ଆସିଥିବା ଗାଡ଼ିକୁ ଲୋକେ ଗଁାକୁ ପୁରାଇ ଦେଇ ନ ଥିଲେ। ଏହାପରେ ଗାଡ଼ିଟି ମହିଳାମାନଙ୍କ ପରିବାର ଲୋକେ ରହୁଥିବା କ୍ୱାରାଣ୍ଟାଇନ ସେଣ୍ଟରକୁ ଫେରିଛି।
ସୁରାଟରୁ ପରିବାର ଲୋକଙ୍କ ସହ ଫେରିଥିବା ଭଞ୍ଜନଗର ବ୍ଲକର କେତେଜଣ ମହିଳାଙ୍କୁ ପ୍ରଶାସନ ପକ୍ଷରୁ ହୋମ୍ କ୍ୱାରାଣ୍ଟାଇନ୍ରେ ରହିବାକୁ ନିର୍ଦ୍ଦେଶ ଦିଆଯାଇଥିଲା। ଫଳରେ ୪ଜଣ ମହିଳା ସରକାରୀ ଗାଡ଼ିରେ ଘରକୁ ଫେରିଥିଲେ। ପରିବାରର ଅନ୍ୟ ପୁରୁଷମାନେ ପ୍ରଶାସନ ପକ୍ଷରୁ ସ୍ଥିରିକୃତ କ୍ୱାରାଣ୍ଟାଇନ୍ ସେଣ୍ଟରରେ ରହିଥିଲେ। ମାତ୍ର ମହିଳାଙ୍କୁ ନେଇ ଆସିଥିବା ଗାଡିକୁ ଗ୍ରାମବାସୀ ଗଁାକୁ ଛାଡ଼ି ନ ଥିଲେ। ଏନେଇ ବିଭାଗୀୟ ଉଚ୍ଚ ପଦାଧିକାରୀଙ୍କୁ ଗ୍ରାମବାସୀ ଜଣାଇବା ପରେ ଗାଡିଟି ଫେରିଯାଇଥିଲା।
ପ୍ରଶାସନ ପକ୍ଷରୁ ମହିଳାମାନଙ୍କୁ ହୋମ୍ କ୍ୱାରାଣ୍ଟାଇନ୍ରେ ରଖିବାକୁ ନିଷ୍ପତି ହୋଇଥିଲା। କିନ୍ତୁ ଗ୍ରାମାଞ୍ଚଳରେ ଏହି ସମସ୍ୟା ଏବେ ପ୍ରଶାସନର ଚିନ୍ତା ବଢାଇଦେଇଛି।