ମୁମ୍ବାଇ,୨୬।୪: ଆଗାମୀ କିଛିଦିନରେ ସ୍ଥାନୀୟ ଗ୍ରସେରି ଷ୍ଟୋରଗୁଡିକ ସାମଗ୍ରୀ ଡେଲିଭରି ଦେବେ। ଏଥି ଲାଗି ଏକ ଜାତୀୟ ଇ-କମର୍ସ ମାର୍କେଟ ପ୍ଲେସ୍ର ଯୋଜନା ହାତକୁ ନିଆଯାଉଛି। ଏହା କାର୍ଯ୍ୟକାରୀ ହେଲେ ଘର ପାଖରେ ଥିବା ଷ୍ଟୋରଗୁଡିକରୁ ଲୋକମାନେ କଣ୍ଟାକ୍ଟଲେସ ଡେଲିଭରି ସୁବିଧା ପାଇବାକୁ ସକ୍ଷମ ହେବେ ବୋଲି କନଫେଡେରେଶନ ଅଫ୍ ଅଲ୍ ଇଣ୍ଡିଆ ଟ୍ରେଡର୍ସ(ସିଏଆଇଟି) ପକ୍ଷରୁ ସୂଚନା ଦିଆଯାଇଛି। ବର୍ତ୍ତମାନର ଅସୁବିଧା ସମୟରେ ଲୋକଙ୍କ ନିକଟରେ ଜରୁରୀ ସାମଗ୍ରୀ ପହଞ୍ଚାଇବା ଲାଗି ଶିଳ୍ପ ପ୍ରୋତ୍ସାହନ ଏବଂ ଆନ୍ତଃବାଣିଜ୍ୟ ବିଭାଗ ସହଯୋଗରେ ସିଏଆଇଟି ମିଳିତ ଭାବେ ଯୋଜନା ହାତକୁ ନେଉଥିବା ଜଣାପଡିଛି। ସ୍ଥାନୀୟ କିରାନା ଷ୍ଟୋରଗୁଡିକ କିଭଳି ଅର୍ଡର ନେଇପାରିବେ ତାକୁ ଧ୍ୟାନରେ ରଖାଯାଇଛି। ଯୋଗାଣ ଚେନ୍କୁ ଦୃଢ କରିବା ପାଇଁ ସବୁ ପ୍ରକାରର ଚେଷ୍ଠା କରାଯାଉଛି ବୋଲି ସିଏଆଇଟି ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ ସାରା ଦେଶରେ ୭ କୋଟି ଟ୍ରେଡର ରହିଛନ୍ତି। ଇ-କମର୍ସ ନ୍ୟାଶନାଲ ମାର୍କେଟ ପ୍ଲେସ୍ ଶୁଭାରମ୍ଭ କରାଯିବା ନେଇ ପ୍ରକ୍ରିୟା ଚୂଡାନ୍ତ ପର୍ଯ୍ୟାୟରେ ରହିଛି ବୋଲି ସିଏଆଇଟି ମହାସଚିବ ପ୍ରଭୀନ ଖଣ୍ଡେଲଓ୍ବାଲ ସୂଚନା ଦେଇଛନ୍ତି।