ନୂଆଦିଲ୍ଲୀ,୨୭-୭: ହ୍ବାଟ୍ସଆପ୍ ପକ୍ଷରୁ ଚଳିତ ବର୍ଷ ଶେଷାର୍ଦ୍ଧରେ ଭାରତରେ ପେମେଣ୍ଟ ସର୍ଭିସ ଆରମ୍ଭ କରାଯିବ ବୋଲି ଘୋଷଣା କରାଯାଇଛି। ଫେସ୍ବୁକ୍ର ସହାୟକ କମ୍ପାନୀ ପକ୍ଷରୁ ଆରମ୍ଭ ହେବାକୁ ଥିବା ଏହି ସେବା ଦ୍ୱାରା ଭାରତୀୟ ୟୁଜରଙ୍କ ପ୍ରତି ବିପଦ ରହିଛି ବୋଲି କେନ୍ଦ୍ର ସରକାର ଆଶଙ୍କା ବ୍ୟକ୍ତ କରିଛନ୍ତି। କାରଣ ହ୍ବାଟ୍ସଆପ୍ ପେମେଣ୍ଟ ସର୍ଭିସରେ ଜମା ହେବାକୁ ଥିବା ଡାଟା ଫେସ୍ବୁକ୍ ଓ ଇନ୍ଷ୍ଟାଗ୍ରାମକୁ ସହଜରେ ମିଳିଯିବ ବୋଲି ସରକାର ମନେ କରୁଛନ୍ତି। ହ୍ବାଟ୍ସଆପ୍ ଓ ଗୁଗଲ ପେ ଭଳି ପେମେଣ୍ଟ ସର୍ଭିସ ଜରିଆରେ ଏକତ୍ରିତ ହେବାକୁ ଥିବା ୟୁଜର ଡାଟାକୁ ହସ୍ତାନ୍ତରରୁ ରୋକିବା ଲାଗି ଉପାୟ ଖୋଜିବାକୁ ସରକାରଙ୍କ ପକ୍ଷରୁ ନ୍ୟାଶନାଲ ପେମେଣ୍ଟସ କର୍ପୋରେଶନ ଅଫ୍ ଇଣ୍ଡିଆ(ଏନ୍ପିସିଆଇ)କୁ ନିର୍ଦ୍ଦେଶ ଦିଆଯାଇଛି। ଦେଶରେ ରିଟେଲ ପେମେଣ୍ଟ ଓ ସେଟେଲମେଣ୍ଟ ସିଷ୍ଟମକୁ ଏନ୍ପିସିଆଇ ନୋଡାଲ ଏଜେନ୍ସି ଭାବେ ଅପରେଟ କରିଥାଏ। ସୂଚନାଥାଉ କି, ୟୁନାଇଟେଡ ପେମେଣ୍ଟସ ଇଣ୍ଟରଫେସ୍କୁ ଆଧାର କରି ହ୍ବାଟ୍ସଆପ୍ର ପ୍ରସ୍ତାବିତ ପେମେଣ୍ଟ ସର୍ଭିସ ଆରମ୍ଭ ହେବାକୁ ଯାଉଛି। ଏହି ସିଷ୍ଟମ ବ୍ୟାଙ୍କ ଆକାଉଣ୍ଟ ମଧ୍ୟରେ ବାସ୍ତବିକ ସମୟରେ ଫଣ୍ଡ ଟ୍ରାନ୍ସଫର ସୁବିଧା ଦେଇଥାଏ।