ନବାଗତ ନାୟକ ଦେବରାଜ। ଗତବର୍ଷ ତାଙ୍କର ଡେବ୍ୟୁ ଫିଲ୍ମ ‘ତୋ ପ୍ରେମରେ ପଡ଼ିଲା ପରେ’ ରିଲିଜ୍ ହୋଇଥିଲା। ଆରମ୍ଭରୁ ହିଁ ସେ ନିଜର ଆକ୍ଟିଂ ଦକ୍ଷତା ଦେଖାଇ ସାଉଁଟିଥିଲେ ସଫଳତା। ଆଉ ଏବେ ବ୍ୟାକ୍-ଟୁ-ବ୍ୟାକ୍ ତିନୋଟି ଫିଲ୍ମ ରିଲିଜ୍ ଅପେକ୍ଷାରେ ରହିଛି। ସେଗୁଡ଼ିକ ହେଲା-ସରୋଜକାନ୍ତଙ୍କ ନିର୍ଦ୍ଦେଶିତ ‘ଚାଲ୍ ଟିକେ ପ୍ରେମ କରିବା, ଏସ୍. ଦୀଲିପ ପଣ୍ଡାଙ୍କ ନିର୍ଦ୍ଦେଶନାରେ ପ୍ରସ୍ତୁତ ‘ତୁ ଲୈଲା ମୁଁ ମଜ୍ନୁ’ ଏବଂ ରଞ୍ଜନ ମିଶ୍ରଙ୍କ ନିର୍ଦ୍ଦେଶିତ ‘ବାବାଜୀକା ଠୁଲୁ’। ଏ ସମ୍ପର୍କରେ ଦେବରାଜ କହନ୍ତି, ‘ଏହି ତିନୋଟି ଫିଲ୍ମର କାହାଣୀ ଭିନ୍ନ ଧରଣର ଏବଂ ମୋତେ ମିଳିଥିବା ଭୂମିକାଗୁଡିକରେ ନୂତନତ୍ୱ ରହିଛି। ‘ବାବାଜୀକା ଠୁଲୁ’ରେ ମୋତେ ଝିଅ ଗେଟ୍ଅପରେ ଦର୍ଶକ ଦେଖିବାକୁ ପାଇବେ। ଅନ୍ୟ ଦୁଇଟି ସିନେମାରେ ମୋତେ ମିଳିଛି ଭିନ୍ନ ଧରଣର ରୋମାଣ୍ଟିକ୍ ଭୂମିକା। କେବଳ ଏହି ତିନୋଟି ଫିଲ୍ମ ନୁହେଁ, ମୋ ଭୂମିକାଗୁଡିକ ମଧ୍ୟ ଦର୍ଶକଙ୍କୁ ଡିଫରେଣ୍ଟ ଟେଷ୍ଟ ଦେବ ବୋଲି ବିଶ୍ୱାସ ରହିଛି।’ ‘ବାବାଜୀକା ଠୁଲୁ’ରେ ତାଙ୍କ ଅପୋଜିଟ୍ରେ ସ୍ବାତୀ ନାୟିକା ସାଜିଥିବା ବେଳେ ଦ୍ୱିଭାଷୀ (ଓଡ଼ିଆ-ଛତିଶଗଡି) ‘ତୁ ଲୈଲା ମୁଁ ମଜନୁ’ରେ ଛତିଶଗଡି ଫିଲ୍ମ ଇଣ୍ଡଷ୍ଟ୍ରିର ରୋମାଣ୍ଟିକ୍ ନାୟିକା ଆନିକେତ ଚୌହାନ ଓ ଓଡ଼ିଆ ଅଭିନେତ୍ରୀ ଚିନ୍ମୟୀ ପ୍ରିୟଦର୍ଶିନୀ ଏବଂ ‘ଚାଲ୍ ଟିକେ ପ୍ରେମ କରିବା’ରେ ଚିନ୍ମୟୀ ପ୍ରିୟଦର୍ଶିନୀ ଫିମେଲ୍ ଲିଡ୍ରେ ଅଛନ୍ତି।
