ଲାସ ଭେଗାସ, ୨୨।୬(ଏପି): ଅଲ୍ଟିମେଟ ଫାଇଟିଂ ଚାମ୍ପିୟନଶିପ୍ (ୟୁଏଫସି) ହେଭିଓ୍ବେଟ ପ୍ରତିଦ୍ୱନ୍ଦ୍ୱୀ ଆମେରିକାର କୁର୍ଟିସ ବ୍ଲେଡ୍ସ ଶନିବାର ରାତିରେ ଅନୁଷ୍ଠିତ କୁସ୍ତି ଲଢ଼େଇରେ ରୁଷିଆର ଆଲେକଜାଣ୍ଡର ଭୋଲକୋଭଙ୍କୁ ପରାସ୍ତ କରିଛନ୍ତି। ପ୍ରତିପକ୍ଷଙ୍କୁ ଅଣନିଃଶ୍ୱାସୀ କରିବାପରେ ନିର୍ବିବାଦରେ କୁର୍ଟିସଙ୍କୁ ବିଜେତା ଘୋଷଣା କରାଯାଇଥିଲା। ଏହାଥିଲା ତାଙ୍କର କ୍ରମାଗତ ୪ର୍ଥ ବିଜୟ। ଫିଦରଓ୍ବେଟ ବିଭାଗରେ ଶେନ ବୁର୍ଗୋସଙ୍କୁ ୨୯-୨୮, ୨୯-୨୮ ଓ ୨୯୨୭ ପଏଣ୍ଟରେ ହରାଇଛନ୍ତି ଜୋଶ୍ ଇମେଟ। ଘରୋଇ ସହରରେ ମିକ୍ସଡ ମାର୍ଶାଲ ଆଟର୍ସକୁ ପ୍ରମୋଟ କରିବା ଉଦ୍ଦେଶ୍ୟରେ ୟୁଏଫସି ଆପେକ୍ସ ଜିମ୍ରେ ବିନା ଦର୍ଶକରେ ଲଢ଼େଇଗୁଡ଼ିକ ଅନୁଷ୍ଠିତ ହୋଇଥିଲା। ଆରମ୍ଭରୁ ନିଜ କୁସ୍ତି ଦକ୍ଷତା ପ୍ରଦର୍ଶନ କରି କୁର୍ଟିସ ପ୍ରତିପକ୍ଷ ଭୋଲକୋଭଙ୍କ ବିପକ୍ଷରେ ଆଧିପତ୍ୟ ବିସ୍ତାର କରିଥିଲେ। ମାତ୍ର ୧୦ ସେକେଣ୍ଡ ମଧ୍ୟରେ ସେ ଭୋଲକୋଭଙ୍କୁ ତଳେ ପକାଇ ଦେଇଥିଲେ। ପାଖାପାଖି ପ୍ରଥମ ୪ ରାଉଣ୍ଡ ପର୍ଯ୍ୟନ୍ତ କୁର୍ଟିସଙ୍କ ପ୍ରାଧାନ୍ୟ ଅବ୍ୟାହତ ରହିଥିଲା। ୪ର୍ଥ ରାଉଣ୍ଡର ଶେଷ ଭାଗ ଏବଂ ୫ମ ରାଉଣ୍ଡରେ ଭୋଲକୋଭ କୌଶଳ ଖଟାଇଥିଲେ ହେଁ ସେତେବେଳକୁ ବହୁ ବିଳମ୍ବ ହୋଇ ଯାଇଥିଲା। ଜଜ୍ମାନେ ବ୍ଲେଡ୍ସଙ୍କ ସପକ୍ଷରେ ୪୯-୪୬, ୪୮-୪୭, ୪୮-୪୬ ପଏଣ୍ଟ ଦେଇଥିଲେ। ହେଭିଓ୍ବେଟ ଟାଇଟଲ ପାଇଁ ବ୍ଲେଡ୍ସ କାମେରୁନ-ଫ୍ରେଞ୍ଚ୍ ପ୍ରଫେଶନାଲ ଫ୍ରାନ୍ସିସ ଏନଗାନୋଉଙ୍କୁ ଭେଟିବା ସମ୍ଭାବନା ରହିଛି। ବ୍ଲେଡ୍ କ୍ୟାରିୟରରେ ମାତ୍ର ୨ ଥର ପରାଜିତ ହୋଇଛନ୍ତି। କୌତୂହଳ କଥା ହେଲେ ସେ ୨ ଥରଯାକ ଏହି ଏନ୍ଗାନୋଉଙ୍କଠାରୁ ହିଁ ୨୦୧୬ ଓ ୨୦୧୮ରେ ହାରିଛନ୍ତି।