ଭୁବନେଶ୍ୱର,୧୫।୯(ବ୍ୟୁରୋ): କ୍ୟାପିଟାଲ ଥାନା ଅନ୍ତର୍ଗତ ୟୁନିଟ୍-୧ ମାର୍କେଟରୁ ଜଣେ ଯୁବକ ସନ୍ଦେହଜନକ ଭାବେ ନିଖୋଜ ହୋଇଯାଇଛନ୍ତି। ଯୁବକ ଜଣକ ପେଟ୍ରୋଲ ଟାଙ୍କି ନିକଟରେ ବାଇକ ପାର୍କିଂ କରି ମାର୍କେଟ ଭିତରକୁ ଯାଉଥିବା ଦୃଶ୍ୟ ସିସିଟିଭି ଫୁଟେଜରେ ରହିଛି। ହେଲେ ସେ ଆଉ ଫେରି ନ ଥିବାରୁ ତାଙ୍କୁ ହାଟ ଭିତରୁ ହିଁ ଯୋଜନାବଦ୍ଧ ଭାବେ ଅପହରଣ କରାଯାଇଥିବା ନେଇ ପରିବାର ଲୋକେ ନୟାପଲ୍ଲୀ ଥାନାରେ ଅଭିଯୋଗ କରିଛନ୍ତି। ନିଖୋଜ ଯୁବକ ହେଲେ କେନ୍ଦୁଝର ଜିଲା ପବିତ୍ରଡ଼ିହା ଗ୍ରାମର ଅମର କୁମାର ଚାଉଡ଼ା(୩୨)। ଅଗଷ୍ଟ ୩୧ ତାରିଖରେ ଏହି ଘଟଣା ଘଟିଥିବାବେଳେ ପୋଲିସ କେବଳ ମିସିଂ ମାମଲା ରୁଜୁ କରି ଚୁପ୍ ବସିଛି। ଅମର ହାଟ ଭିତରୁୁ କୁଆଡେ ଗଲେ ଓ ତାଙ୍କୁ କିଏ ଅପହରଣ କଲା ତାହାକୁ ନେଇ ଏବେ ନାନା ସନ୍ଦେହ ଘନୀଭୂତ ହେବାରେ ଲାଗିଛି। ପୋଲିସ ଯୁବକଙ୍କ ମୋବାଇଲ୍ ଫୋନ୍ କଲ୍ ଡିଟେଲ୍ସ ଯାଞ୍ଚ କରିଥିଲେ ମଧ୍ୟ କିଛି ବି ସୁରାକ ମିଳୁ ନ ଥିବା କହୁଛି। ଇତିମଧ୍ୟରେ ଘଟଣାକୁ ୧୫ ଦିନ ବିତିଯାଇଛି। ହାଟ ଓ ନିକଟରେ ଲାଗିଥିବା ସିସିଟିଭି ଫୁଟେଜରୁ ଅମରଙ୍କ ସମ୍ପର୍କରେ କିଛି ବି ସୂଚନା ମିଳିପାରୁ ନ ଥିବାରୁ ପରିବାର ଲୋକେ ଏବେ ଆଶଙ୍କାରେ ରହିଛନ୍ତି। ଅମର ଜୀବିତ ନା ତାଙ୍କ ସହ ଅନ୍ୟ କିଛି ଘଟଣା ଘଟିଛି ସେହି ଚିନ୍ତାରେ ସେମାନେ ବ୍ୟତିବ୍ୟସ୍ତ ହୋଇପଡ଼ିଛନ୍ତି। ଥାନାକୁ ବାରମ୍ବାର ଦୌଡ଼ି ନିରାଶ ହେବା ପରେ ପୋଲିସ କମିଶନରଙ୍କୁ ଭେଟି ପୁଅକୁ ଖୋଜି ଦେବାକୁ ଗୁହାରି କରିଛନ୍ତି। ଅନ୍ୟପକ୍ଷରେ ପରିବାର ଲୋକେ ଅମରଙ୍କ ଫଟୋ ବସ୍ଷ୍ଟାଣ୍ଡ, ରେଲ୍ଓ୍ବେ ଷ୍ଟେଶନ ଆଦି ବିଭିନ୍ନ ଜନଗହଳିପୂର୍ଣ୍ଣ ସ୍ଥାନରେ ଲଗାଇଛନ୍ତି। ଅମରଙ୍କ ସମ୍ପର୍କରେ କେହି ସୂଚନା ଦେଲେ ୨୦ ହଜାର ଟଙ୍କା ପୁରସ୍କାର ଦେବେ ବୋଲି ସେଥିରେ ଉଲ୍ଲେଖ କରିଛନ୍ତି।
ସୂଚନାନୁଯାୟୀ, ଅମର ୧୬ ବର୍ଷ ହେବ ଗାଁର ସାଙ୍ଗଙ୍କ ସହ ଭୁବନେଶ୍ୱର ଆସି ସିସି କ୍ୟାମେରା ଲଗାଇବା କାର୍ଯ୍ୟ କରନ୍ତି। ନୟାପଲୀ ବେହେରାସାହିରେ ଜଣେ ସାଙ୍ଗର ମାଉସୀ ପୁଅଙ୍କ ସହ ରହୁଥିଲେ। ଘଟଣା ଘଟିଥିବା ରାତିରେ ସେ ରୋଷେଇ ସାରି ୟୁନିଟ୍-୧ ମାର୍କେଟକୁ ଯାଉଥିବା ରୁମ୍ମେଟ୍ଙ୍କୁ କହି ବାହାରିଥିଲେ। ଘରୁ ଯିବା ସମୟରେ ମଧ୍ୟ ସେ ମା’ଙ୍କ ସହ କଥା ହେଉଥିଲେ। ମାର୍କେଟରୁ ପରିବା ସହ ଜୋତା ଷ୍ଟାଣ୍ଡ୍ ଓ ଅନ୍ୟ ସାମଗ୍ରୀ କିଣିବାକୁ ଯାଉଥିବା କହିଥିଲେ। ମାର୍କେଟରୁ ଫେରି କଲ୍ କରିବୁ ବୋଲି ମା’ କହିଥିଲେ। ବହୁ ଡେରି ହେବାରୁ ରୁମ୍ମେଟ୍ ଜଣକ ଖାଇସାରି ଶୋଇପଡିଥିଲେ। ଅମର ପାଇଁ ମଧ୍ୟ ଭାତ ତରକାରି ଘୋଡ଼େଇ ରଖିଦେଇଥିଲେ। ହେଲେସେ ସକାଳୁ ଉଠିବା ପରେ ଅମର ଆସି ନ ଥିବା ଓ ଖାଦ୍ୟ ସେମିତି ଥୁଆ ହୋଇଥିବା ଦେଖି ତାଙ୍କ ମୋବାଇଲ୍ ଫୋନ୍କୁ କଲ୍ କରିବାରୁ ବନ୍ଦ ଥିବା ଜଣାପଡିଥିଲା। ଶେଷରେ ଏ ସମ୍ପର୍କରେ ସେ ତାଙ୍କ ପରିବାର ଲୋକଙ୍କୁ ଜଣାଇବାପରେ ସେମାନେ ଭୁବନେଶ୍ୱର ଆସି ଥାନାରେ ଅଭିଯୋଗ କରିବା ସହ ଖୋଜାଖୋଜି ଆରମ୍ଭ କରିଥିଲେ। ମାର୍କେଟ ନିକଟରୁ ତାଙ୍କର ବାଇକ ମିଳିଥିଲା। ତାଙ୍କର ଶେଷ ଫୋନ୍ କଲ୍ ମାର୍କେଟରେ ହିଁ ହୋଇଥିବା ଜଣାପଡିଛି। ତେଣୁ ଅମରଙ୍କୁ ଅପହରଣ କରାଯାଇଥିବା ପରିବାର ଲୋକେ ଆଶଙ୍କା କରୁଛନ୍ତି। ଏନେଇ ନୟାପଲୀ ଥାନା ଅଧିକାରୀ ଅରୁଣ କୁମାର ସ୍ବାଇଁ କହିଛନ୍ତି, ଅମରଙ୍କ ନିଖୋଜ ନେଇ ଅଭିଯୋଗ ପରଠାରୁ ତଦନ୍ତ ଚାଲିଛି। ହେଲେ ତାଙ୍କର କୌଣସି ପତ୍ତା ମିଳୁନି।