ପ୍ୟାରିସ୍ ,୧୬ା୧୧(ପି.ଟି.): ଅନ୍ତର୍ଜାତୀୟ ବ୍ୟାପାରକୁ ନେଇ ପାକିସ୍ତାନର ଅପରିପକ୍ୱ ପ୍ରଚାରକୁ ୟୁନେସ୍କୋ ସମ୍ମିଳନୀରେ ଭାରତ କଡ଼ା ସମାଲୋଚନା କରିଛି। ଏହାର ବିକ୍ଷିପ୍ତ ବ୍ୟବହାର ଏବଂ ଆତଙ୍କବାଦ ସହ ଘନିଷ୍ଠ ସମ୍ପର୍କ ଯୋଗୁ ଏହା ପ୍ରାୟତଃ ବିଫଳ ରାଷ୍ଟ୍ର ସ୍ତରକୁ ଖସିଆସିଥିବା ଭାରତ କହିଛି। ଭାରତ ବିରୋଧରେ ବିଷ ବୁଣିବା ଓ ଏହାକୁ ରାଜନୈତିକ ରୂପ ଦେବା ଲାଗି ପାକିସ୍ତାନ ୟୁନେସ୍କୋର ଅପବ୍ୟବହାର କରୁଥିବାରୁ ଏହାକୁ ଆମେ ନିନ୍ଦା କରୁଛୁ ବୋଲି ଭାରତୀୟ ପ୍ରତିନିଧି ଦଳର ନେତୃତ୍ୱ ନେଉଥିବା ଅନନ୍ୟା ଅଗ୍ରଓ୍ବାଲ କହିଛନ୍ତି। ଭାରତକୁ ବଦନାମ କରାଇବା ପାଇଁ ପାକିସ୍ତାନ ମନଗଢ଼ା ମିଥ୍ୟା ପ୍ରଚାର ଚଳାଇଛି, ଯାହା ଛଳନା ଓ କପଟତାରେ ପୂର୍ଣ୍ଣ। ଇସ୍ଲାମାବାଦର ଏଭଳି ପିଲାଳିଆମୀକୁ ଆମେ ନିନ୍ଦା କରୁଛୁ ବୋଲି ଭାରତର ଉତ୍ତର ରଖିବା ଅଧିକାର ବଳରେ ଅନନ୍ୟା କହିଥିଲେ।
ଭାରତର ସର୍ବୋଚ୍ଚ ଅଦାଲତଙ୍କ ରାୟକୁ ନେଇ ପାକିସ୍ତାନ ଅବାଞ୍ଛିତ ମନ୍ତବ୍ୟ ଦେଉଛି। ଆଇନରେ ସବୁ ଧର୍ମକୁ ସମାନ ମର୍ଯ୍ୟାଦା ପ୍ରଦାନ କରାଯାଇଛି। ତଦନୁଯାୟୀ ଅଦାଲତ ରାୟ ପ୍ରଦାନ କରିଛନ୍ତି। ଅଯୋଧ୍ୟା ରାୟକୁ ନେଇ ଇସ୍ଲାମାବାଦର ପ୍ରତିକ୍ରିୟା ନିନ୍ଦନୀୟ ବୋଲି ଭାରତର ପ୍ରତିନିଧି କହିଛନ୍ତି। ସୂଚନାଯୋଗ୍ୟ, ଧର୍ମୀୟ ସ୍ବାଧୀନତାକୁ ନେଇ ୟୁନେସ୍କୋ ମୂଲ୍ୟବୋଧ ଆଧାରରେ ବାବ୍ରୀ ମସ୍ଜିଦ ରାୟ ଆସି ନ ଥିବା ପାକିସ୍ତାନର ଶିକ୍ଷାମନ୍ତ୍ରୀ ଶଫକତ୍ ମହମ୍ମଦ କହିଥିଲେ।