ଭୋପାଳ,୧୦।୧: ଆଗାମୀ ଉତ୍ତରପ୍ରଦେଶ ବିଧାନସଭା ନିର୍ବାଚନର ଫଳାଫଳ ବେଶ୍ ଚକିତ କରିପାରେ। ଏହା ପଛରେ କାରଣ ଭାଜପା ସରକାର ପ୍ରତି ଥିବା ଲୋକମାନଙ୍କ ଅସନ୍ତୋଷ ଏବଂ କଂଗ୍ରେସର ସାଧାରଣ ସମ୍ପାଦିକା ପ୍ରିୟଙ୍କା ଗାନ୍ଧୀ ଭଦ୍ରା ଜାରି ରଖିଥିବା ପ୍ରଚାର ଅଭିଯାନ। ଏଭଳି ପୂର୍ବାନୁମାନ କରିଛନ୍ତି ପୂର୍ବତନ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ କମଲ ନାଥ।
ଫେବୃୟାରୀ ୧୦ ତାରିଖରୁ ୟୁପିରେ ୭ ପର୍ଯ୍ୟାୟରେ ନିର୍ବାଚନ ହେବ। ମାର୍ଚ୍ଚ ୧୦ରେ ଏହାର ଫଳାଫଳ ଘୋଷଣା କରାଯିବ।
ପ୍ରିୟଙ୍କା ଆରମ୍ଭ କରିଥିବା ‘ଲଡ୍କି ହୁଁ ଲଡ୍ ସକ୍ତି ହୁଁ’ (ମୁଁ ଝିଅଟେ ଲଢ଼ି ପାରିବି) ଅଭିଯାନକୁ ୟୁପିରେ ପ୍ରତ୍ୟେକ ଧର୍ମ ଓ ଜାତିର ଲୋକ ସ୍ବୀକାର କରିଛନ୍ତି।
“ମୁଁ ନିକଟରେ ୟୁପି ଯାଇଥିଲି। ମୋ ଯୁବ କଂଗ୍ରେସ ବେଳର ସହଯୋଗୀଙ୍କୁ ଭେଟିଥିଲି। ଲୋକେ ଶାସକ ଦଳ ଉପରେ ରାଗିଛନ୍ତି। ଆଉ ପ୍ରିୟଙ୍କାଙ୍କ ଉଦ୍ୟମ ରାଜ୍ୟରେ ପରିବର୍ତ୍ତନ ଆଣିବ। ନିର୍ବାଚନ ଫଳାଫଳ କେବଳ କଂଗ୍ରେସକୁ ନୁହେଁ ପୂରା ରାଜ୍ୟକୁ ଚକିତ କରିଦେବ” ବୋଲି ବରିଷ୍ଠ କଂଗ୍ରେସ ନେତା ଏକ ଖବରଦାତା ସମ୍ମିଳନୀରେ କହିଛନ୍ତି।