ଖୋର୍ଦ୍ଧା ଅଫିସ, ୫।୧୧: ଖୋର୍ଦ୍ଧା ଜିଲା କୋଲକାତା- ମାଡ୍ରାସ ୧୬ ନଂ. ଜାତୀୟ ରାଜପଥ ଟାଙ୍ଗୀ ଥାନା ଅନ୍ତର୍ଗତ ଟାଙ୍ଗୀ ବାଇପାସ୍ରୁ ସୋମବାର ରାତିରେ ୧କୋଟି ଟଙ୍କାର ସିଗାରେଟ ଭର୍ତ୍ତି ଏକ କଣ୍ଟେନର ଗାଡି ଲୁଟ୍ ହୋଇଛି। ଆଇଟିସି କମ୍ପାନୀର ଦାମୀ ସିଗାରେଟ ଭର୍ତ୍ତି ଉକ୍ତ ଗାଡିଟି ହାଇଦ୍ରାବାଦରୁ କୋଲକାତା ଅଭିମୁଖେ ଯାଉଥିଲା। ଲୁଟେରାମାନେ ଟାଙ୍ଗୀ ବାଇପାସରୁ ଗାଡି ସହ ଚାଳକଙ୍କୁ ନେଇଯାଇଥିଲେ। ହାତ, ଗୋଡ ବାନ୍ଧି ଉଗ୍ରତାରା ଜଙ୍ଗଲରେ ଚାଳକଙ୍କୁ ଫିଙ୍ଗି ଟ୍ରକ ନେଇଯାଇଥିବା ଜଣାପଡ଼ିଛି। ସ୍ଥାନୀୟ ଲୋକେ ଚାଳକଙ୍କୁ ଉଦ୍ଧାର କରିଛନ୍ତି। ଚାଳକ ଟାଙ୍ଗୀ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଛି ।