ଗଣ୍ଡତୁରୁମ, ୫ା୧୨ (ଡି.ଏନ.ଏ.)- ବରଗଡ଼ ଜିଲା ଭେଡ଼େନ ବ୍ଲକ ମହୁଲପାଲି ଗାଁର ଘନ ଦେହେରୀ(୯୦)। ସେ ଭତାର ଲାଗି ପାଖାପାଖି ୧୦ ଥର ଆବେଦନ କରି ନିରାଶ ହେଇଥିବାର ଅଭିଯୋଗ କରିଛନ୍।
ସୂଚନା ହିସାବେ ମହୁଲପାଲି ଗଁାର ଘନ ଦେହେରୀକଁର ପରିବାର କହେଲେ ମାଏକିନା ସାଲିଣି, ୩ ପୁଓ ଆର ଗୁଟେ ଝି’କେ ନେଇ ସଁସାର। ଘନ ଝନେ ନିହାତି ଗରିବ ଆର ଭୂମିହୀନ ଆଏ। ସେ ୧୯୬୯ ସାଲେ ହେଇଥିବାର ବଡ଼ଭାରି ମର୍ଡିରେ ପେଟପାଟନାର ଲାଗି କୁଟୁମବସିଆ ଏହେଦ୍କାର ସୁବର୍ଣ୍ଣପୁର ଜିଲା ବୀରମହାରାଜପୁର ଅଂଚଲର କୁଞ୍ଜାମହୁଲରୁ ବରଗଡ଼ ଜିଲା ମହୁଲପାଲିକେ ପଲେଇ ଆସିଥିଲେ। ମହୁଲପାଲିରେ ଘନ ପରହର ଗୁତି ଖଟି ନିଜର କୁଟୁମ ପାଲିଥିଲେ। ପିଲାଛୁଆ ବଡ଼ ହେଲା ଉତାରୁ ସମ୍କୁ ଦୁଖ୍ସୁଖ କରି ବିହାଚୁରା କରିସାରିଛନ୍। ଏହେଦେ ସଭେ ନିଜର ନିଜର କୁଟୁମ ଧରି ଅଲଗେ ରହୁଛନ୍। ଏହେଦେ ଜୀବନ୍ର ଶେଷ ମୁଡ଼ସାନେ ଥିବାର ଇ ବୁରୁଧ୍ ଦମ୍ପତି ବଡ଼ା ଦୁଖେ ଚଲୁଛନ୍। ଘନ ଅନ୍ତ୍ୟୋଦୟ ଅନ୍ନପୂର୍ଣ୍ଣା ଯୋଜନାରେ ୩୫ କେ.ଜି. ଚାଉଲ ପାଉଛନ୍। ଯେନ୍ଟା ଦମ୍ପତିକୁଁ ମାସେ ଚଲବାର ଲାଗି ଠିକ୍ ହେଉଛେ। ହେଲେ ତେଲ ନୁନ୍ କରବାକେ, ଦିହିପା ଖରାପ ହେଲେ ଉଷୋକଷା କରବାକେ ହାତେ ଅଦ୍ଲେ ନଁାଇଁନ। ବୁଢ଼ାବୁଢ଼ି ଭତାର ଲାଗି ପାଖାପାଖି ୧୦ ଥର ଆବେଦନ କରିଛେଁ। ଇଥିରଲାଗି ଥାନୀଅ ସରପଁଚ୍ନୁ ବିଡିଓ ଆର ବିଧାୟିକାକୁଁ ବି ଗୁହାରି କରି ନିରାଶ ହେଇଥିବାର ଘନ କହିଛନ୍। ସେନ୍ତା ସରକାର ଆମକୁ ଦୁଇ ବୁଢ଼ାବୁଢ଼ିକୁ ଭତା ଟିକେ ଦେବାର ବେବସ୍ତା କଲେ ଆମର ଦୁଖ୍ ଘୁଁଚ୍ତା, ଟିକେ ଭଲ୍ସେ ଚଲିପାରତୁଁ ବଲି ଘନକଁର ମାଏକିନା ସାଲିଣି କହିଛନ୍। ଜିଲା ଆର ବ୍ଲକ ପରଶାସନ ଇ ବୁରୁଧ୍ ଦମ୍ପତି ଉପରେ ଦୁରୁଷ୍ଟି ଦେଇ ଯେତେ ଜଲଦି ହେବା ଭତା ଯୁଗେଇ ଦେବାକେ ଗଁାବାସୀ ଦାବି କରିଛନ୍।