ଦେବଗଡ଼, ୯।୨(ଡି.ଏନ.ଏ.)- ଆଗାମୀ ୧୦ରୁ ୧୪ ତାରିଖ ପର୍ଯ୍ୟନ୍ତ ଦୀର୍ଘ ୫ଦିନ ଧରି ପ୍ରଧାନପାଟ ଜଳପ୍ରପାତ ପାଦଦେଶରେ ଥିବା ମୁକ୍ତାକାଶ ରଙ୍ଗମଞ୍ଚରେ ପାଳିତ ହେବାକୁ ଥିବା ଉତ୍ସବ ପ୍ରଧାନପାଟ -୨୦୨୦ ନିମନ୍ତେ ଜିଲା ପ୍ରଶାସନ ପକ୍ଷରୁ ସମସ୍ତ ପ୍ରକାର ପ୍ରସ୍ତୁତି ଚୂଡାନ୍ତ ପର୍ଯ୍ୟାୟରେ ପହଞ୍ଚିଛି। ଏ ସମ୍ପର୍କରେ ଶନିବାର ଓସ୍ୱାନ ପ୍ରକୋଷ୍ଠରେ ଜିଲାପାଳ ସୁଧାଂଶୁ ମୋହନ ସାମଲଙ୍କ ଅଧ୍ୟକ୍ଷତାରେ ଆୟୋଜିତ ଏକ ଖବରଦାତା ସମ୍ମିଳନୀରେ ଆନୁଷ୍ଠାନିକ ଭାବେ ସୂଚନା ପ୍ରଦାନ କରାଯାଇଛି। ଏହି ସୂଚନା ଅନୁଯାୟୀ ଚଳିତବର୍ଷ ଏହି ଉତ୍ସବ ପାଳନ ନିମନ୍ତେ ୧୭ ଲକ୍ଷ ଟଙ୍କାର ବ୍ୟୟ ଅଟକଳ ରଖାଯାଇଛି। ୧୦ତାରିଖ ଉଦ୍ଘାଟନୀ ଦିବସରେ ସ୍ଥାନୀୟ କନକଦୁର୍ଗା ମନ୍ଦିର ପରିସରରୁ ଏକ ସାଂସ୍କୃତିକ ମଶାଲ ଶୋଭାଯାତ୍ରା ବାହାରି ପ୍ରଧାନପାଟ ପର୍ଯ୍ୟନ୍ତ ଯିବା ସହ ଅଧିଷ୍ଠାତ୍ରୀ ମା’ ପ୍ରଧାନପାଟେଶ୍ୱରୀଙ୍କ ପୀଠରେ ପହଞ୍ଚତ୍ବ। ସେଠାରୁ ଆଜ୍ଞାମାଳ ଅଣାଯିବା ପରେ ମୁକ୍ତାକାଶ ସାଂସ୍କୃତିକ ମଞ୍ଚରେ ମଶାଲ ସ୍ଥାପନ କରାଯିବାର କାର୍ଯ୍ୟକ୍ରମ ରହିଛି। ଏହି ଉତ୍ସବରେ ରାଜ୍ୟ ବାହାରୁ ୩ଟି ଖ୍ୟାତନାମା ସାଂସ୍କୃତିକ ଦଳ, ରାଜ୍ୟର ୨୦ଟି ଓ ଜିଲାର ୯ଟି ଦଳ ସମେତ ମୋଟ ୩୨ଟି ସାଂସ୍କୃତିକ ଦଳ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ଏମାନଙ୍କ ମଧ୍ୟରେ କୋଲକାତାର ସୋମା କୁଣ୍ଡୁ ଓ ଗ୍ରୁପ, ଛତିଶଗଡର ସରସ୍ବତୀ କଳା ନିକେତନ ରହିଥିବା ଜଣାପଡିଛି। ସେହିପରି ବଲାଙ୍ଗୀରର ଢାପ ନୃତ୍ୟ, ଜଟଣୀର କଥକ ଓ ମଣିପୁରୀ, ଝାରସୁଗୁଡାର ଝୁମେର ନୃତ୍ୟ, ବାଙ୍କୀର ଫ୍ୟୁଜନ, କେନ୍ଦ୍ରାପଡାର ପାଟୁଆ ନାଚ, ତୁଷୁରାର ଘୁଡକା ନାଚ, କଳାହାଣ୍ଡିର ସିଙ୍ଗାରୀ ଚାଙ୍ଗୁ ଓ ଘୁମୁରା, ବରଗଡର ପରଭା ନୃତ୍ୟ, ଗଜପତି, କୁଚିଣ୍ଡା,ସମ୍ବଲପୁର ଓ ଦେବବଗଡ ଜିଲାର ବିଭିନ୍ନ ସାଂସ୍କୃତିକ ଅନୁଷ୍ଠାନ ଆଦି ୩୨ ଗୋଟି ସାଂସ୍କୃତିକ ଦଳ ଅଂଶଗ୍ରହଣ କରି ଲୋକ ନୃତ୍ୟ ପ୍ରଦର୍ଶନ କରିବାର କାର୍ଯ୍ୟକ୍ରମ ରହିଛି ା ଏହି ଅବସରରେ ୧୦ରୁ ୧୪ ତାରିଖ ପର୍ଯ୍ୟନ୍ତ ଓରମାସ ପକ୍ଷରୁ ପଲ୍ଲିଶ୍ରୀ ମେଳା ଅନୁଷ୍ଠିତ ହେବ ଓ ଏଥିରେ ୨୩୦ ଟି ଷ୍ଟଲ ଖୋଲାଯିବ। ଏଥିସହ ଫୁଡପ୍ଲାଜା ଓ କୃଷିବିଭାଗ ପକ୍ଷରୁ କୃଷିମେଳା ଓ କୃଷକ ପାଠଶାଳା ଓ ପୁସ୍ତକ ମେଳାସହ କବି ସମ୍ମିଳନୀର କାର୍ଯ୍ୟକ୍ରମ ରହିଛି ବୋଲି ଜିଲାପାଳ ସାମାଲ ଏହି ଖବରଦାତା ସମ୍ମିଳନୀରେ ସୂଚନା ଦେଇଥିଲେ। ଏହି ଖବରଦାତା ସମ୍ମିଳନୀରେ ଉପ ଜିଲାପାଳ ବ୍ରଜବନ୍ଧୁ ଭୋଇ, ସହକାରୀ ଜିଲାପାଳ କୈବଲ୍ୟ କର, ଦେବଗଡ ପୌରପରିଷଦ ଅଧିକାରୀ କୁଞ୍ଜବନ ପ୍ରଧାନ ଏବଂ ଓରମାସ୍ର ଡିଏସ୍ଏମଏସ୍ ସୁବଳ ଜେନାମଣି ପ୍ରମୁଖ ଉପସ୍ଥିତ ଥିଲେ ା ଶେଷରେ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ବିଜୟ କୁମାର ମିଶ୍ର ଧନ୍ୟବାଦ ଅର୍ପଣ କରିଥିଲେ।