???????????????????????????????????????????????????????????????????????????????????????????????????????????????????????????????
ଭୁବନେଶ୍ୱର, ୮ା୨(ବ୍ୟୁରୋ): ରାଜଧାନୀରେ ରଙ୍ଗ୍ସାଇଡ୍ରେ ଡ୍ରାଇଭିଂ କରୁଥିବା ଗାଡ଼ି ଚାଳକଙ୍କ ସଂଖ୍ୟା ବଢୁଛି। ତେଣୁ କମିଶନରେଟ ପୋଲିସ ଏହା ଉପରେ ରୋକ୍ ଲଗାଇବା ପାଇଁ ପଦେକ୍ଷପ ନେଇଛି। ଗୁରୁବାର ପ୍ରଥମେ ଦିନରେ ରାଜଧାନୀର ୯ଟି ସ୍ଥାନରେ ଯାଞ୍ଚ କରାଯାଇ ୮୦ ଜଣ ରଙ୍ଗ୍ସାଇଡ୍ ଗାଡ଼ି ଚାଳକଙ୍କୁ ଧରିବା ସହ ସେମାନଙ୍କ ଗାଡ଼ିିକୁ ଜବତ କରିଛି। ଏହି ଯାଞ୍ଚର ୨୪ ଘଣ୍ଟା ନ ପୁରୁଣୁ ଯାଞ୍ଚ ହେଉଥିବା ଛକରେ ପୂର୍ବଭଳି ଅବସ୍ଥା। ତେଣୁ ପୁଣି ଆସନ୍ତା ୧୦ ତାରିଖଠାରୁ ସପ୍ତାହକ ପର୍ଯ୍ୟନ୍ତ ରଙ୍ଗ୍ସାଇଡ଼୍ ଗାଡ଼ିଚାଳନାକୁ କଡ଼ାକଡ଼ି ଯାଞ୍ଚ କରାଯିବ ବୋଲି ଟ୍ରାଫିକ ଡିସିପି ସାଗରିକା ନାଥ ଶୁକ୍ରବାର ସୂଚନା ଦେଇଛନ୍ତି।
ଅନ୍ୟପକ୍ଷରେ ଜବତ ଗାଡ଼ିିର ପ୍ରୋସିକ୍ୟୁଶନ ରିପୋର୍ଟ ପ୍ରସ୍ତୁତ କରିବା ଟ୍ରାଫିକ ପୋଲିସ ପାଇଁ ସମସ୍ୟା ଉପୁଜୁଛି। କାରଣ ଏହି ରିପୋର୍ଟରେ ଏକାଧିକ ଫର୍ମ ପୂରଣ କରିବାକୁ ପଡୁଛି। ତେଣୁ ଯେତିକି ଗାଡ଼ି ଧରାପଡ଼ିିଛି ସେଗୁଡିକର ରିପୋର୍ଟ ଏକା ସମୟରେ ପ୍ରସ୍ତୁତ କରିବା ଟ୍ରାଫିକ ପୋଲିସ ପାଇଁ ମୁଣ୍ଡବ୍ୟଥାର କାରଣ ହୋଇଛି। ଅନେକେ ଟ୍ରାଫିକ ପୋଲିସ ଏହାର ପ୍ରୋସେସ୍ ଜାଣିନାହାନ୍ତି। ତେଣୁ ଏହାକୁ ଦୃଷ୍ଟିରେ ରଖି ଏଭଳି କାଗଜପତ୍ର ପ୍ରସ୍ତୁତ ପାଇଁ ଏକାଧିକ ଟ୍ରାଫିକ ପୋଲିସଙ୍କୁ ଟ୍ରେନିଂ ଦିଆଯିବ ବୋଲି ଡିସିପି ନାଥ କହିଛନ୍ତି। ସେହିପରି ପୁଳା ପୁଳା ପ୍ରୋସିକ୍ୟୁଶନ ରିପୋର୍ଟ କୋର୍ଟକୁ ବୋହି ନେବାରେ ମଧ୍ୟ ହଇରାଣ ହେବାକୁ ପଡ଼ୁଛି। ତେଣୁ ଏଥିପାଇଁ ଜଣେ ବ୍ୟକ୍ତିଙ୍କୁ ନିୟୋଜିତ କରାଯାଇଛି। ଅନେକ ସମୟରେ ଟ୍ରାଫିକ ପୋଲିସ ଜବତ କରିଥିବା ଗାଡ଼ିର ପ୍ରୋସିକ୍ୟୁଶନ ରିପୋର୍ଟ କୋର୍ଟକୁ ପଠାଇବା ପରେ ଗାଡ଼ି ମାଲିକମାନେ ରଙ୍ଗ୍ସାଇଡ୍ରେ ଗାଡ଼ି ଚାଳନା କରି ନ ଥିବା ଫାଙ୍କିବାର ସମ୍ଭାବନା ରହିଛି। ତେଣୁ ପୋଲିସ ବଡି କ୍ୟାମେରା ସାହାଯ୍ୟରେ ରଙ୍ଗ୍ସାଇଡ୍ ଗାଡ଼ିଚାଳକଙ୍କ ଫୁଟେଜ କଏଦ କରି ରଖିବ। ଯଦି କେହି ଏହାକୁ ଫାଙ୍କିବାକୁ ଚେଷ୍ଟା କରନ୍ତି ତାହାଲେ ଏହି ଫୁଟେଜକୁ କୋର୍ଟରେ ଦାଖଲ କରାଯିବ। ଯେଉଁଠାରେ ଫୁଟେଜ କଏଦ ହୋଇ ନ ଥିବ ସେଠାରେ ସାକ୍ଷୀମାନଙ୍କୁ ସମନ କରାଯାଇ କୋର୍ଟକୁ ଡକାଯିବ ବୋଲି ଡିସିପି ସୂଚନା ଦେଇଛନ୍ତି।
ପୋଲିସ ପକ୍ଷରୁ ପ୍ରତିଦିନ ରଙ୍ଗ୍ସାଇଡ଼୍ ଗାଡ଼ିଚାଳକଙ୍କୁ ଧରାଯାଉଥିବାରୁ ଜବତ ଗାଡ଼ି ଗୁଡିକୁ ଏଜି ଛକସ୍ଥିତ ଟ୍ରାଫିକ ଥାନାରେ ରଖିବାକୁ ଜାଗା ନାହିଁ। ତେଣୁ ଏକାଧିକ ଗାଡ଼ିକୁ ରିଜର୍ଭ ଗ୍ରାଉଣ୍ଡକୁ ନେବା ପାଇଁ ପୋଲିସ ପକ୍ଷରୁ ବ୍ୟବସ୍ଥା କରାଯାଇଛି। ଅନ୍ୟପଟରେ ଟ୍ରାଫିକ ପୋଲିସ ଉପରେ ମଧ୍ୟ ଅଭିଯୋଗ ଲାଗିଛି। ପୋଲିସ ଲୋକଙ୍କ ଦାମୀ ଗାଡ଼ି ଜବତ କରୁଥିଲେ ମଧ୍ୟ ଠିକ୍ ଢଙ୍ଗରେ ନେଉ ନ ଥିବାରୁ ଗାଡ଼ିର ବିଭିନ୍ନ ଯନ୍ତ୍ରାଂଶ ଭାଙ୍ଗି ଯାଉଛି। ଏଥିଯୋଗୁ ସମ୍ପୃକ୍ତ ଗାଡ଼ିଗୁଡ଼ିକର ମାଲିକମାନେ ଅସନ୍ତୋଷ ବ୍ୟକ୍ତ କରିଛନ୍ତି।