ପିପିଲି,୧୮ା୪(ଡି.ଏନ.ଏ): ଚାଲିବାକୁ ବଳ ପାଉନାହିଁ। ତଥାପି କଷ୍ଟେମଷ୍ଟେ ପାଦ ପକାଇବାକୁ ପଡ଼ୁଛି। ଭୋକ ବାଟ କଢାଇ ନେଉଛି। ଢେଙ୍କାନାଳରୁ ପିପିଲି ପାଖାପାଖି ୧୦୦ କିମି ଚାଲି ଚାଲି ଘରକୁ ଫେରିଛନ୍ତି କେତେଜଣ ଦିନମଜୁରିଆ। ଶୁକ୍ରବାର ପିପିଲି ବଜାରରେ ଏମାନେ ପହଞ୍ଚିଛନ୍ତି। ଢେଙ୍କାନାଳ କପିଳାସସ୍ଥିତ ଅନ୍ନପୂର୍ଣ୍ଣା ରାଇସ ମିଲରେ କାମ କରୁଥିଲେ ପୁରୀ ଜିଲା ସୁକଳ ଓ ବ୍ରହ୍ମଗିରିର କେତେଜଣ ଯୁବକ। ସେମାନେ ହେଲେ ବାମବରଡାର ବଳରାମ ସ୍ବାଇଁ, ଚଣ୍ଡପଡ଼ାର ଚନ୍ଦ୍ର ଶେଖର ବିଶ୍ବାଳ, ଦାମୋଦରପୁରର ପ୍ରକାଶ ଜେନା, ମାନସ ଜେନା ଏବଂ ଶମ୍ଭେଶ୍ବର ଜେନା। ତେବେ କରୋନା ପାଇଁ କମ୍ପାନୀରେ କାମ ବନ୍ଦ ହୋଇଯିବା ପରେ ଦୁଃଖକଷ୍ଟରେ କିଛିଦିନ ବିତାଇଲେ। ଖାଇବା ସମସ୍ୟା ସାଙ୍ଗକୁ ପଇସାପତ୍ର ସବୁ ଶେଷ ହୋଇଗଲା। ଭୋକର ଦାଉ ଯେତେବେଳେ ବଢିଲା ସେତେବେଳେ ଘରମୁହାଁ ହୋଇଛନ୍ତି ଏହି ଯୁବକମାନେ। ଗୁରୁବାର ରାତି ୧୨ଟାରେ ଢେଙ୍କାନାଳରୁ ପାଦ କାଢିଥିଲେ। ଶୁକ୍ରବାର ଅପରାହ୍ନ ୫ଟାରେ ଏମାନେ ପିପିଲିରେ ପହଞ୍ଚିଥିଲେ। ରାତି ପାହିଲେ ନିଜ ନିଜ ଗାଁ ଅଭିମୁଖେ ବାହାରିବେ ବୋଲି ଏହି ଯୁବକମାନେ କହିଛନ୍ତି। ଖବର ପାଇ ପିପିଲିର ପିପୁଲ ଫର୍ ସେବା ଏବଂ ଜାଗୃତି ସାଂସ୍କୃତିକ ଯୁବ ସଂଗଠନ, ବାଟମହାବୀର କ୍ଲବ ପକ୍ଷରୁ ସେମାନଙ୍କୁ ଖାଇବା ପାଇଁ ଦିଆଯାଇଥିଲା।