ଆମେରିକାର ମିନେପୋଲିସ୍ ସହରରେ ପୋଲିସ ହେପାଜତରେ ଥିବା ଜର୍ଜ ଫ୍ଲୋୟଡ୍ ନାମକ ଜଣେ କୃଷ୍ଣକାୟଙ୍କ ମୃତ୍ୟୁ ହେବା ପରେ ସାରା ଦେଶରେ ପ୍ରତିବାଦ ନିଆଁ ଜଳିଛି। ଲୋକେ ପ୍ଲାକାର୍ଡ, କାଗଜ ଏବଂ ବୋଡ ଧରି ଏହାର ବିରୋଧ ପ୍ରଦର୍ଶନ କରୁଛନ୍ତି। ଏସବୁ ଭିତରେ ଜଣେ ବ୍ୟକ୍ତି ନିଆରା କାର୍ଯ୍ୟକରି ପ୍ରଶଂସିତ ହୋଇଛନ୍ତି। ପ୍ରତିବାଦ କରି ଲୋକେ ଘରକୁ ଯିବା ପରେ ଆଣ୍ଟୋନିଓ ଜିୟନ୍ ନାମକ ଜଣେ ବ୍ୟକ୍ତି ସହରରେ ପଡିଥିବା ଅଳିଆ ଆବର୍ଜନାକୁ ଉଠାଇ ରାସ୍ତା ସଫା କରିଥିଲେ। ୧୮ ବର୍ଷୀୟ ଆଣ୍ଟୋନିଓ ନ୍ୟୁୟର୍କରେ ରାତି ୨ଟାରୁ ଦିନ ୧୨ଟା ପର୍ଯ୍ୟନ୍ତ ଅଳିଆ ଉଠାଇଥିଲେ। ମ୍ୟାଟ୍ ବ୍ଲକ୍ ନାମକ ଜଣେ ବ୍ୟକ୍ତି ଆଣ୍ଟୋନିୟଙ୍କ କାର୍ଯ୍ୟରେ ଖୁସି ବ୍ୟକ୍ତ କରି ତାଙ୍କୁ ଏକ କାର ଉପହାର ଦେଇଥିଲେ। ଏପରି ଉପହାର ପାଇବା ପରେ ମୋ ପାଖରେ କହିବାକୁ କୌଣସି ଶବ୍ଦ ନାହିଁ ବୋଲି ଆଣ୍ଟୋନିଓ କହିଛନ୍ତି। ସେ ଏବେ କଲେଜରେ ପଢୁଥିବା ଜଣାପଡିଛି। ସୂଚନାଯୋଗ୍ୟ, ମିନେପୋଲିସ୍ ସହରରେ କୃଷ୍ଣକାୟ ବ୍ୟକ୍ତିଙ୍କୁ ଜଣେ ପୋଲିସ ଅଧିକାରୀ ଆଣ୍ଠୁରେ ଚାପି ରଖି ମାରିଦେବାର ଭିଡିଓ ଭାଇରାଲ ହେବା ପରେ ହିଂସା କ୍ରମଶଃ ଉଗ୍ର ରୂପ ଧାରଣ କରିଛି। ସମ୍ପୃକ୍ତ ପୋଲିସ ଅଧିକାରୀ ଏବଂ ତାଙ୍କୁ ସହାୟତା କରିଥିବା ପୋଲିସ ବିରୋଧରେ ଆହୁରି କଠୋର କାର୍ଯ୍ୟାନୁଷ୍ଠାନ ଦାବିରେ ସାରା ଦେଶରେ ବିକ୍ଷୋଭ ପ୍ରଦର୍ଶନ କରାଯାଉଛି।